Astana-Ulanbatyr arasyndaǵy tikeleı áýe qatynasy qaıta jandanady
ASTANA. KAZINFORM – Búgin elordada Qazaq-mońǵol bıznes forýmy ótedi. Bul týraly Aqordada elimizge memlekettik saparmen kelgen Mońǵolııa Prezıdenti Ýhnaagıın Hýrelsúhpen keńeıtilgen quramdaǵy kelissóz barysynda Memleket basshysy Qasym-Jomart Toqaev aıtty.
- Búgin elordamyzda Qazaq-mońǵol bıznes forýmy ótedi. Oǵan Mońǵolııadan kelgen kóptegen kompanııa qatyspaqshy. Biz muny tolyq quptaımyz. Sizdiń tarapyńyzdan kórsetilgen qoldaýǵa rızashylyǵymdy bildiremin. Mádenı-gýmanıtarlyq baılanys qos halyqtyń dostyǵyn bekemdeı túsýge oń yqpal etip otyr. Biz Astana men Ulanbatyr arasyndaǵy tikeleı áýe qatynasyn qaıta jandandyrýǵa kelistik. Bilim berý, mádenıet jáne týrızm salalaryndaǵy jetistikterimiz de az emes. Qazaqstanda bilim alýǵa nıeti bar mońǵol jastaryna esigimiz árdaıym ashyq, - dedi Qasym-Jomart Toqaev.
Prezıdent jaqynda Ulanbatyrda ótken bokstan Azııa chempıonatyna toqtaldy.
- Dúbirli doda kezinde qazaq sportshylaryna qonaqjaılylyq kórsetkenderińiz úshin alǵys aıtamyz. Shara joǵary deńgeıde uıymdastyryldy. Ózińiz biletindeı, qazaq boksshylary jalpy komandalyq esepte 1-oryn aldy. Memleketterimiz arasyndaǵy san qyrly yntymaqtastyq jyldan-jylǵa artyp kele jatqanyn erekshe atap ótkim keledi. Sizdiń búgingi saparyńyzdyń qorytyndylary yqpaldastyǵymyzǵa tyń serpin beretinine kámil senemin, - dedi Memleket basshysy.
Buǵan deıin Qasym-Jomart Toqaev Aqordada Mońǵolııa Prezıdentin qarsy alǵanyn jazǵan edik.
