Astana — Ulan-Batyr baǵytynda áýe reısi ashylady — Serik Jumanǵarın

ASTANA. KAZINFORM — Eki memleket arasynda kólik salasy damyp keledi. Bul jóninde QR Premer-mınıstriniń orynbasary — QR Ulttyq ekonomıka mınıstri Serik Jumanǵarın Qazaqstan-Mońǵolııa bıznes forýmynda málimdedi.

— Álemdik saýdanyń turaqty ósýiniń faktory — ózara kólik baılanysyn nyǵaıtý. Elderimizdiń arasyndaǵy kóliktik yntymaqtastyq Transkaspıı halyqaralyq kólik baǵyty sheńberinde qarqyndy damyp keledi. Bul baǵyt — «Bir beldeý — bir jol» jahandyq bastamasymen birlesip, soltústik-ońtústik jáne shyǵys-batys dálizderiniń áleýetin ashýǵa qosymsha kómek, — dedi ol.

Sonymen birge, Serik Jumanǵarın jýyrda jańa áýe reısi ashylatynyn atap ótti.

— Búginde Almaty — Ulan-Batyr baǵytynda tikeleı áýe qatynasy júzege asyp jatyr. Jaqyn arada Astana — Ulan-Batyr baǵyty boıynsha tikeleı áýe qatynasyn ashý josparlanyp otyr. Bul qadam iskerlik, gýmanıtarlyq jáne týrıstik baılanystardy nyǵaıtýǵa tyń serpin beredi, — dedi ol.

Aıta keteıik, buǵan deıin Mońǵolııa Qazaqstannan bıdaı ımporty kólemin arttyrýǵa qyzyǵýshylyq tanytqanyn jazǵanbyz.