Astana əýejaıynda polıtsııa Monako komıssaryn tún ishinde ustaǵan
ASTANA. QazAqparat - QR Іshki ister mınıstrligi Kóliktegi ishki ister departamentiniń basshysy Amanjol Qabylov QazAqparat agenttiginiń resmı saýalyna jaýap bere otyryp, Monako komıssary Djýlen Sellarıoǵa qatysty Astana halyqaralyq əýejaıynda oryn alǵan oqıǵanyń mən-jaıyn aıtyp berdi.
"Polıtseılerdiń aıtýy boıynsha, shetel azamaty 2016 jylǵy qazan aıynyń 26-nan 27-ne qaraǵan túni Astana qalasy áýejaıynda belgilenbegen jerde shylym shegýge áreket etkeni úshin Astana qalasy áýejaıyndaǵy Jelilik polıtsııa bólimine jetkizilgen", - delingen Kóliktegi ishki ister departamentiniń baspasóz qyzmetiniń málimetinde.
Buǵan deıin Monako komıssaryna polıtsııa eshqandaı qujat toltyrmastan 120 evro kóleminde aıyppul salmaq boldy degen aqparat taraǵan edi. Ol polıtsııalardyń bireýi 30, ekinshisi 26 jasta eken.
"Sotqa deıingi tergeý barysynda Astana qalasy áýejaıynda belgilenbegen jerde shylym shegýge áreket etkeni úshin sheteldik azamatty Astana qalasy áýejaıyndaǵy Jelilik polıtsııa bólimine jetkizgen 1986 jáne 1993 j.j. týǵan polıtsııa qyzmetkerlerinen qorǵaýǵa quqyǵy bar kýáger retinde suraq alyndy. Qazirgi ýaqytta osy is tergelý rettiligin anyqtaý úshin QR BP Bas kólik prokýratýrasyna jiberildi", - dep jaýap bergen kóliktegi ishki ister departamentiniń basshysy A.Qabylov.
Al, "Temirjol, áýe jáne temirjol kóligindegi tártipti qadaǵalaıtyn Kóliktegi ishki ister departamentiniń qyzmetkerleri qoǵamdyq orynda temeki tartqan adamǵa neshe teńge kóleminde aıyppul sala alady?" degen suraqqa vedomstvo: "Ákimshilik quqyq buzýshylyq týraly Qazaqstan Respýblıkasynyń Kodeksiniń 441-baby boıynsha jekelegen qoǵamdyq oryndarda temeki shegýge tyıym salýdy buzǵandarǵa tıisti ákimshilik jaýapkershilikter belgilengen. Atap aıtqanada, Qazaqstan Respýblıkasynyń zańnamasynda temeki shegýge tyıym salý belgilengen jekelegen qoǵamdyq oryndarda temeki shegý - jeke tulǵalarǵa úsh aılyq eseptik kórsetkish mólsherinde (6363 teńge) aıyppul salýǵa ákep soǵady; Osy baptyń birinshi bóliginde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan áreket - jeke tulǵalarǵa alty aılyq eseptik kórsetkish mólsherinde (12726 teńge) aıyppul salýǵa ákep soǵady; Jumys berýshiniń temeki shegý úshin arnaıy oryndar bólýdi kózdeıtin Qazaqstan Respýblıkasynyń zańnamasyn buzýy, sondaı-aq bul úshin arnaıy belgilenbegen oryndarda temeki shegýshilerge sharalar qoldanbaýy laýazymdy adamǵa - on (21210 teńge), zańdy tulǵalarǵa qyryq aılyq eseptik kórsetkish mólsherinde (84840) aıyppul salýǵa ákep soǵady", dep jaýap bergen.
Al, "Astana Ekspo-2017" ulttyq kompanııasynyń baspasóz qyzmeti Ekspo kórmesindegi Monako pavılonynyń komıssary Djýlen Sellarıo Qazaqstannan Monakoǵa ketip qalǵanyn jetkizdi.
