Astana túrmesindegiler telefon, sýyq qarýdy eden men qabyrǵaǵa jasyryp kelgen
NUR-SULTAN. QazAqparat - Qylmystyq-atqarý júıesi departamentiniń ETs-166/5 mekemesinde aýmaqtyq bólimshe qyzmetkerleri jospardan tys tintý júrgizdi, dep habarlaıdy QazAqparat.
Sottalǵandardyń jeke zattaryn tekserý «Mercedes Benz» bazasyndaǵy rentgen televızııalyq jabdyqtardy, NR-2000 markaly jelilik emes lokatordy qoldanýmen júzege asyryldy, sondaı-aq jyljymaly beınetirkegishter paıdalanyldy.
Tintý barysynda 4 uıaly telefon men 5 túıregish jáne kesetin qarý tabylyp tárkilendi. Joǵaryda atalǵan uıaly baılanys quraldary jatyn bólmeniń edeninde, sondaı-aq sheshinetin bólmeniń qabyrǵasyna jasyrylǵan.
Esterińizge sala keteıik, tórt kún buryn olar osy mekemege arba dóńgelekteriniń osine jasyrylǵan asa úlken mólsherde «gashısh» alyp ótpek bolǵan edi.
ETs-166/5 mekemesi qyzmetkerleriniń qyzmettik mindetin adal atqaryp, kásibı sheberlik kórsetýiniń arqasynda esirtki alyp ótý áreketin ǵana emes, tótenshe oqıǵa faktilerine jol bermedi.
Atap aıtqanda, sottalǵandar arasyndaǵy, mekeme ákimshiligi men sottalǵandar arasyndaǵy janjaldardyń aldyn aldy.
«Osy baǵyttaǵy jumys jalǵasýda. Sottalǵandarǵa paıdalanýǵa tyıym salynǵan zattardy berýge tyrysatyn «izgi nıetti adamdarǵa» sottalǵandardyń densaýlyǵyna zııan keltirip qana qoımaı, olardyń jaǵdaıyn da nasharlatasyz. Óıtkeni esirtki zattaryn paıdalanǵan jaǵdaıda olardyń merziminen buryn bosaý, sondaı-aq telefon arqyly sóılesý, uzaq jáne qysqa merzimdi kezdesýlerdi paıdalaný sııaqty quqyqtaryn shekteýge áser etetin tártiptik sıpattaǵy sharalar qoldanylady degim keledi», – dedi ETs-166/5 mekemesi bastyǵynyń orynbasary Almas Oralbaı.
