Astana túrki áleminiń mádenı astanasy ataýyna ábden laıyq - akter Nurjan Tutov
ALMATY. QazAqparat - El júregi - Astana búginde naǵyz shyǵarmashylyq ortasyna aınalǵan. Qalanyń qaıtalanbas sáýleti, mańyzdy mádenı nysandar Qazaqstan túgil búkil Túrki áleminiń astanasy dep atalýyna tolyq qaqysy bar. Mundaı pikirimen «Tamasha» ázil-syqaq teatrynyń rejısseri, belgili qazaqstandyq shoýmen Nurjan Tutov bólisti.
«Bizdiń astanamyzda osy ataýǵa laıyq bolatyndaı barlyq múmkindik bar. Qaıtalanbas sáýlet stıli, qaınap jatqan shyǵarmashylyq ómir, Opera teatry sııaqty álemdik aýqymdaǵy mádenı nysandar qalamyzdyń mereıin odan ári arttyra túsedi», - dedi Nurjan Tutov.
Óner adamy qalamyzdyń álemdik astanalardyń reıtınginde kósh bastaýyna tilektestik bildirdi.
«Biz kóp turǵydan Eýropa, AQSh, Reseı elderimen ıyq tiresip turǵan elmiz. Meniń qyzym Aleksandrııaǵa oqýǵa barǵysy keldi. Men «qyzym, ózimizdiń elde de myqty oqytýshylar bar, Eýrazııa ulttyq ýnıversıtetine túsemiz. Óz elińdi, óz Otanyńdy súıýiń kerek dedim», - dep syr bólisti akter.
