Astana turǵynynan quny 59 mln. teńge bolatyn 9 kelige jýyq geroın tabyldy
ASTANA. QazAqparat - Jedel-izdeý sharalaryn ótkizý barysynda Astana qalalyq ІІD-niń esirtki bıznesine qarsy kúres basqarmasynyń qyzmetkerleri «Arlan» arnaıy bólimshesiniń jaýyngerleri jáne ІІD-niń kınologııalyq qyzmetimen birigip, qyzmettik-izdeý ıtteriniń kómegimen esirtkige qatysty zańsyz is-qımyldarǵa qatysty tulǵalardy ustaý, sondaı-aq elorda aýmaǵynda asa iri kólemde esirtkini satý arnasyn jabý boıynsha arnaıy operatsııany júrgizdi.
Salmaǵy 3 keliden astam «geroın» esirtkilik zattyń satqany úshin Astana qalasynyń 41 jastaǵy turǵyny ustaldy. Polıtseıler tergeý sharalaryn ótkizip, ony tekserý kezinde úıiniń aýlasyndaǵy qurylystan sondaı-aq salmaǵy bes keliden astam geroındi anyqtady. Alynǵan esirtkiniń jalpy salmaǵy 9 kelige jýyq boldy, dep habarlady Astana qalalyq ІІD-niń baspasóz qyzmetinen.
Qara bazarda alynǵan esirtkiniń baǵasy shamamen 59 mıllıon teńgeni nemese 40 myńǵa jýyq dozany quraıdy.
Azamat «L»-ǵa qatysty QR QK-niń 297-babynyń 4-bólimi boıynsha sot aldyndaǵy tergeý amaldary júrgizilip jatyr. Astana qalalyq ІІD-niń Tergeý basqarmasy tergeý amaldaryn júrgizip jatyr.
Qazirgi ýaqytta Astana qalalyq ІІD-niń qyzmetkerleri esirtkini jetkizý arnalaryn jáne esirtkini satý kestesin, sondaı-aq ustalǵan azamattyń elorda aýmaǵynda esirtki qylmystaryn jasaýǵa qatysyn anyqtaý maqsatymen arnaıy jedel-izdeý sharalar keshenin júrgizýde.
Jyl basynan beri ІІD-niń bólimsheleri túrli esirtkilik zattardyń 90 kelisin zańsyz aınalymnan shyǵardy. Esirtki zattarynyń zańsyz aınalymymen baılanysty qylmystyq áreketterdiń 213 faktisi anyqtalǵan.
