Astana turǵynynan 140 myń dollardyń esirtkisi tárkilendi
KÓKShETAÝ. QazAqparat - Aqmola oblysynyń polıtseıleri iri esirtki tasymalynyń jolyn kesti. Tárkilengen 140 keli gashısh úshin kóleńkeli naryqtan 140 myń AQSh dolllary kóleminde qarjy tabýǵa bolatyn edi, dep habarlaıdy QazAqparat Aqmola oblystyq ishki ister departamentine silteme jasap.
Departament taratqan málimetterge qaraǵanda, esirtki bıznesine qarsy kúres bóliminiń qyzmetkerleri Arshaly men Jaqsy aýdandarynyń aýmaǵynda eki sátti operatsııa uıymdastyrdy. Osy sharalardyń nátıjesinde iri esirtki partııasyn zańsyz saýdalap jáne satyp kelgen degen kúdikpen bir top adamdar qolǵa tústi.
«16 naýryzda Arshaly aýdanynda polıtsııa qyzmetkerleri «Ekaterınbýrg - Almaty» trassasynyń boıynan «Mersedes Bens» markili kóligin toqtatty. Kólikti Astananyń 34 jastaǵy turǵyny basqaryp kelgen. Kóliktiń fýrgonyn tekserý barysynda 5 qorap, rıýkzak pen polıetılen paket tabylyp, tárkilendi. Olardan gashısh esirtkisi shyqty. Tárkilengen esirtkiniń salmaǵy 140 kg 530 gramm boldy. Mundaı kólemdegi esirtkimen kóleńkeli naryqtan 140 myń dollar tabýǵa bolatyn edi»,-dedi óńirdiń ІІD-niń ókilderi.
Atalǵan fakti boıynsha, QR QK-niń 296 baby, 4 bóligi (Esirtkilik zattardy satý úshin zańsyz paıdalaný) boıynsha sotqa deıingi tergeý júrip jatyr.
Osy kúni Jaqsy aýdanynyń aýmaǵynda polıtsııa qyzmetkerleri 264 gramm gashısh saýdalamaq bolǵan ustalǵan toptyń taǵy bir múshesin qolǵa túsirdi. Onyń úıin tekserý barysynda esirtkilik zattar men tapansha jáne onyń oqtary tabyldy.
Qazirgi tańda polıtsııa qyzmetkerleri jedel tergep-tekserý sharalaryn jalǵastyrýda. Kúdiktiler qamaýǵa alynyp, ýaqytsha ustaý ızolıatoryna qamaldy.
