Astana turǵyny jalǵyz ulyn múgedek etken dárigerdi jazalaýdy surady
ASTANA. QazAqparat - Astana ákiminiń orynbasary Ermek Amanshaev bilim berý, densaýlyq saqtaý, mádenıet jáne sport salasy boıynsha halyq aldynda esep berdi, dep habarlaıdy QazAqparat tilshisi.
Onda qala turǵyny Araılym Áltaeva jalǵyz ulyn múgedek etken elordalyq dárigerdi jazalaýdy surady.
"2016 jyly ulym 9 jasynda dárigerdiń kesirinen múgedek bolyp qaldy. Dáriger óz kinásin moıyndady. Jaza retinde aýrýhana basshylyǵy dárigerdi syıaqydan aıyrdy. Jaı ǵana syıaqydan aıyrdy. Qalaısha? Nege dárigerlerge shara qoldanylmaıdy? "Dárigerlerdi jazalaı bersek, adamdardy kim emdeıdi" degen jaýap estımin. Sonda olar balalardy múgedek ete bersin be? Basqa dárigerlerge sabaq bolý úshin, arnaıy zań shyǵarý kerek", - dedi Araılym Áltaeva Astana ákimi orynbasarynyń esep berý jıynynda.
Astana turǵynynyń aıtýynsha, múgedek balaǵa dári alýda jáne mektepke berýde kedergiler kóp.
"Meniń balam qazir 8 dári ishedi. Sodan, búıregine suıyqtyq jınalyp, dárigerler gepatıt dıagnozyn qoıyp jatyr. Úkimetke rahmet, segiz dáriniń bireýin - 46 myń teńge turatyn "Topamaksty" tegin berip jatyr. Biraq, eki ret sol dárini ákimdiktiń aralasýymen aldym. Zań boıynsha maǵan berilýi kerek bolsa, nege barǵan jerden ala almaımyn? Ulymdy mektepke qabyldatý úshin de sizderdi shaqyrttym. Nege qaıta-qaıta sizderge júginýim kerek?" - dedi A. Áltaeva.
Ashynǵan ananyń saýalyna qalalyq densaýlyq saqtaý basqarmasy basshysynyń orynbasary Sáýle Nurasheva jaýap berdi.
"Birinshiden, dárigerdiń kinásin anyqtaý úshin arnaıy komıssııa jınaý kerek. Onda arnaıy saraptama júrgiziledi. Komıssııa sheshimimen dáriger kináli dep tabylsa, zań júzinde jazalanady. Dári-dármekke kelsek, 1 qańtardan bastap, barlyq dárilerdi SQ "Farmatsııa" satyp alady. Satyp alǵan dárilerdiń aqshasyn qor tóleıdi. Dáriler bizdiń qoımaǵa keledi jáne patsıentterge yńǵaıly bolý úshin dárilerdi bir orynnan alatyndaı ettik. Qazir barlyq dárilerdi emhanadan ala alasyz, - dep jaýap berdi S. Nurasheva.
Óz kezeginde Ermek Amanshaev jıynnan keıin máseleniń mán-jaıyn anyqtaýdy usyndy.
"Shynyn aıtqanda, eshbir dáriger aldyna kelgen adamǵa jamandyq oılamaıdy. Ony múgedek eteıin demeıdi. Shamasy kelgenshe, óziniń bilimi men tájirıbesi jetkenshe kómektesýge tyrysady. Árbir jaǵdaıdy túgel teksereıik. Jıynnan keıin bizge kelińiz, densaýlyq saqtaý basqarmasymen birlesip, egjeı-tegjeıin anyqtaıyq. Eger dáriger tarapynan kiná anyqtalsa, árıne jazalanady", - dedi E. Amanshaev. 
Buǵan deıin QR Densaýlyq saqtaý mınıstri Eljan Birtanov dárigerlerdiń qatelesýge quqyǵy bar ekenin málimdegen bolatyn.
