Astana turǵyny jaqyndaryn «jerleýge» kólik jaldap, alaıaqtyq jasap kelgen
ASTANA. QazAqparat - Elordada qaıtys bolǵan jaqyn adamyn jerleý úshin kólik jaldap, keıin júrgizýshiden qaryzǵa aqsha alyp boı tasalap kelgen alaıaq ustaldy. Qalalyq ІІD-den málim etkendeı, qylmysker osy stsenarıımen birneshe adamdy san soqtyrǵan, dep habarlaıdy QazAqparat tilshisi.
Astana qalalyq ІІD baspasóz qyzmetiniń málimetinshe, 43 jastaǵy azamat S. jeke kóligimen jolaýshy tasymaldaýmen aınalysatyndarǵa júginip, jaqyn týysynyń qaıtys bolǵanyn jáne ony jer qoıyna tapsyrý úshin aýrýhanadan alyp ketý qajettigin aıtqan. Bul rette ol shalǵaıdaǵy eldi mekenderdi atap, máıitti jetkizip bergeni úshin qomaqty qarjy tóleýge ýáde berip otyrǵan.
«Medıtsınalyq mekeme janyna kelgennen keıin júrgizýshilerdiń ańqaýlyǵyn jáne aıaýshylyq sezimderin paıdalanǵan kúdikti, qujattardy rásimdeý úshin júrgizýshiden aqsha suraǵan. Ony kórsetken qyzmeti úshin tóleıtin somamen birge qaıtaryp beretindigin aıtqan. Aqshany alǵannan keıin kúdikti aýrýhanaǵa kirip, basqa esikten belgisiz baǵytqa boı tasalap otyrǵan. Qazirgi ýaqytta kúdikti dál osyndaı jolmen birneshe márte alaıaqtyq jasaǵany anyqtaldy», - delingen departament taratqan aqparatta.
Máselen, 11 maýsymda azamat S. jeke kóligimen jolaýshy tasymaldaıtyn júrgizýshilerdiń birine kelip, qalalyq aýrýhanadan balasynyń múrdesin alyp, eldi mekenderdiń birine jerleý úshin jetkizý qajettigin jáne bul qyzmetke 100 myń teńgeden astam qarajat tóleıtindigin aıtqan. Usynysqa kelisken júrgizýshi aýrýhana aýmaǵyna kelgen. Sol ýaqytta azamat S. júrgizýshiden qaryzǵa 2300 teńge alyp, ǵımarattyń qabyldaý bólmesine kirip ketip, qaıta oralmaǵan.
Dál osyndaı jolmen kúdikti taǵy bir azamatty aldap ketken. Ol aýrýhanaǵa kelgennen keıin «Gazel» kóliginiń júrgizýshisine týysynyń máıitin dittegen jerge jetkizip bergeni úshin qomaqty qarajat tóleıtindigin aıtqan. Sonymen qatar júrgizýshiden qaryzǵa 7 myń teńge jáne qońyraý shalý úshin uıaly telefonyn alyp, belgisiz baǵytqa boı tasalaǵan.
«Keshendi jedel izdestirý sharasy barysynda azamat S. ustaldy. Qazirgi ýaqytta kúdikti ýaqytsha oqshaýlaǵyshqa qamaldy. Tergeýshiler onyń alaıaqtyń áreketinen kelgen shyǵyn somasyn anyqtap jatyr. QR Qylmystyq kodeksiniń «Alaıaqtyq» baby boıynsha sotqa deıingi tergeý amaldary júrgizilýde. Astana qalalyq Іshki ister departamenti osyndaı alaıaqtyq áreketke tap bolyp, alaıda qandaı da bir sebeptermen shaǵymdanbaǵan azamattarǵa myna telefon nómirleri boıynsha Almaty aýdandyq ishki ister basqarmasyna júginýdi suraıdy: 8 (7172) 71-67-10, 71-67-90, nemese 102», - dep atap ótedi baspasóz qyzmeti.
