Astana turǵyny temeki tuqylyn jerge tastaǵany úshin qamaýǵa alyndy
ASTANA. QazAqparat - Astana qalasynyń mamandandyrylǵan aýdanaralyq ákimshilik sotynyń otyrysynda 54 jastaǵy elorda turǵynyna qatysty úkim shyǵaryldy, dep habarlaıdy Astana qalasynyń ІІD-iniń baspasóz qyzmetinen.
Atalǵan azamat qoǵamdyq orynda temeki tuqylyn jerge tastap, sol áreketimen kópshilik paıdalanatyn oryndy lastap, qoǵamdyq tártipti buzǵan. Astana qalasynyń Ákimshilik soty QR ÁQBtK 434 babymen kózdelgen er adamdy ákimshilik quqyqbuzýshylyq - usaq quqyqbuzýshylyq jasaǵany úshin kináli dep taýyp, oǵan ákimshilik jaza retinde 3 táýlikke qamaýdy taǵaıyndaǵan.
Taǵy da bir qoǵamdyq tártipti buzýshy Almaly kóshesiniń boıynda ornalasqan oqý ǵımaratynyń qasynda shekildeýik shaǵyp, sol áreketimen qoǵamdyq oryndy lastaǵany úshin sot sheshimimen 1 táýlikke ákimshilik qamaýǵa alyndy. Óz jazalaryn quqyqbuzýshylar Astana qalasy ІІD arnaıy qabyldaý ortalyǵynda óteıdi.
Jyl basynan beri Astana qalasynyń polıtseıleri «múldem tózbeýshilik» qaǵıdasyn oryndaýdyń sheńberinde 52 usaq quqyqbuzýshylyqty anyqtady, sonyń ishinde sottyń tártibimen 3 myńǵa jýyq is quqyqbuzýshylyqqa qatysty bolsa, 494 quqyqbuzýshy 10 táýlik merzim ýaqytyna ákimshilik qamaýǵa alynyp, 2,5 myńǵa jýyq adamǵa aıyppul salyndy.
Eske sala keteıik, ákimshilik zańnamaǵa sáıkes «usaq quqyqbuzýshylyq» - qoǵamdyq oryndarda bylapyt sóz aıtý, jeke tulǵalarǵa til tıgizip tıisý, turǵyn ǵımarattar men qoǵamdyq oryndardy, saıabaqtardy lastaý, oǵan qosa kommýnaldy qaldyqtardy tastaý bolyp sanalady. Atalmysh bapty buzǵan úshin 10 AEK kóleminde aıyppul nemese 10 táýlikke deıin qamaýǵa alý, qaıtalanǵan quqyqbuzýshylyqta 15 táýlikke deıin qamaýǵa alý qarastyrylǵan.
