Astana turǵyny Stepnogorda jalǵan aqshaǵa uıaly telefon satyp alǵan
KÓKShETAÝ. QazAqparat - Aqmola oblysynyń Stepnogor qalasynda jalǵan aqshaǵa uıaly telefon satyp alǵan astanalyq ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń dereginshe, 7 qańtar kúni Stepnogor qalalyq PB kezekshilik bólimine jergilikti turǵyn habarlasyp, alaıaqtyq qurbany bolǵanyn aıtqan. Zardap shegýshiniń túsiniktemesi boıynsha, beıtanys jas jigit odan uıaly telefon satyp alyp, aqysyna jalǵan aqsha tólegen. Osynyń saldarynan uıaly telefon ıesine 70 myń teńge kóleminde shyǵyn kelgen.
«Jedel izdestirý sharasy barysynda tártip saqshylary Astana qalasynyń 23 jastaǵy turǵynyn qolǵa túsirdi. Kúdikti qylmysyn birden moıyndady. Onyń sózinshe, aqshanyń jalǵan ekenin bilmegen. Qazirgi tańda tekseris júrgizilip, jalǵan aqsha saraptamaǵa jiberildi», dep túsindirdi vedomstvodan.
Osyǵan oraı, polıtseıler oblys turǵyndaryna jalǵan aqshaǵa qatysty barlyq áreket zańmen qýdalanatynyn eskertýde.
«Eger sizdiń qolyńyzda jalǵan aqsha bolsa, onda ony ótkizýge tyryspańyz. Bul kezde ózińiz de qylmysqa qatysy bar adamǵa aınalasyz», dep tolyqtyrdy vedomstvodan.
