Astana turǵyny páteriniń sýyqtyǵynan balalaryn balalar úıine ótkizdi
ASTANA. QazAqparat - Elordadaǵy Imanov - Brýsılovskıı kóshesindegi úıdi salýshylar ruqsatsyz óz erkimen turǵyn úıdiń joǵarǵy qabatynan mansardy salǵan, dep habarlaıdy «QazAqparat» HAA tilshisi.
Ol páterlerdiń birine balalary bar otbasy qonystanypty. Alaıda ol úı jylýǵa qosylmaǵan bolyp shyqqan. Páterdegi adam tózgisiz sýyqtyń saldarynan ata-ana balalaryn balalar úıine ótkizgen. Bul týraly Elorda Info aqparat kózi turǵyn úı qurylysy boıynsha vedomstvoaralyq komıssııa otyrysy kezinde atalmysh komıssııa múshesi Tatıana Chýrsınanyń aıtqanyn habarlaıdy.
Qurylys júrgizýshilerdiń ókilderi jańadan salynǵan 19 páterde jylýdyń joqtyǵyn alǵa tartqan.
«Bir áıel úıinde adam tózgisiz sýyqtyń saldarynan balalaryn balalar úıine ótkizip jibergen. Onda turý múmkin emes. Jaǵdaı osy», - deıdi komıssııa múshesi Tatıana Chýrsına.
Qala ákiminiń birinshi orynbasary Sergeı Horoshýnnyń aıtýynsha, Imanov - Brýsılovskıı kóshesindegi úı turǵyzýshy bir jyl buryn ákimdikke tehnıkalyq qabattardy páter etip ózdiginen qurylys júrgizý máselesi boıynsha shaqyrylǵan.
«Biz qurylys salýshy men merdigerdi osynda shaqyrǵanbyz. Merdiger resmı túrde shynynda da, páterdi qaıta josparlap salýdy kózdegenin, biraq buzýshylyqqa jol bergenin túsine otyryp, eshqandaı satylym bolmaıtynyn málimdegen. Nysandy aıaqtap, zańbuzýshylyqqa jol bermeıtinin aıtqan. Bizde osynyń bárin tirkegen resmı hattama bar. Dese de, ýaqyt óte kele, nysan paıdalanýǵa berilip ketken ýaqytta atalǵan qurylys salýshy páterdi qaıta josparlaý arqyly salyp, aýmaqty paıdaǵa asyrǵan. Qazir bul zańbuzýshylyq qylmystyq is aıasynda qaralap jatyr», - deıdi Sergeı Horoshýn.
Osy zańsyzdyqtyń saldarynan turǵyndar áli kúnge deıin páterlerin óz attaryna aýdara almaı otyr. Ákimniń birinshi orynbasary jumys komıssııasyn quryp, atalǵan máseleni sheshý úshin usynys ázirleý kerektigin habarlady.
