Astana turǵyny qurylys kompanııasynyń zańsyz aqsha jınaǵanyna aryzdandy

Onyń aıtýynsha, «Aq-Shańyraq» turǵyn úıiniń qurylysyna jaýapty kompanııa zańsyz aqsha jınap jatyr.

«2012 jyly meniń anam «Aq-Shańyraq» turǵyn úıinen páter satyp alǵan bolatyn. Alaıda oǵan tek 2017 jyly ǵana kirdik. Úıdiń jaǵdaıy nashar. Syrtyn keramogranıtpen qaptaımyz dep edi, biraq jaı sylaı saldy. Koreıadan jetkizilgen lıft qoıamyz dedi. Ol da joq. Mogıleflıftmashty qoıa saldy. Qyzmet kórsetýshi kompanııa joq. Bárin bir adam istep júr. Elektrık te, santehnık te, lıfter de sol. Keshke qaraı podezdge kirýge qorqamyz», - dep jazdy Á.Aýshatova.

Onyń sózine qaraǵanda, jaqynda qurylys kompanııasy árbir turǵynnan 50 000 teńgeden jınaı bastaǵan. «Bas kezinde ol aqshaǵa kúl-qoqysty shyǵaryp, jaryq pen jylýǵa jumsaımyz dedi. Artynan turǵyndar kúl-qoqysty ózderi shyǵarǵannan keıin Erjan degen qurylys kompanııasynyń ókili ol aqsha bir rettik alym dep shyǵa keldi. Túbirtek bermeıdi, bir dápterge qol qoıa salyńdar deıdi. Kompanııanyń áreketi qanshalyqty zańdy? Ne isteýge bolady?», - deıdi Á.Aýshatova.

QazAqparat tilshisi «Intel-Sıstem-TK» JShS-niń ókili Erjan Úderbekovke habarlasyp, máseleniń mán-jaıyn bilgen edi. Onyń aıtýynsha, «Aq-Shańyraq» turǵyn úı kesheni resmı túrde tapsyrylǵan joq. Soǵan qaramastan, úleskerlerge óz páterlerine kirýge ruqsat berildi. «Byltyrdan beri jylý, sý men jaryq bar. Al úı áli eskplýatatsııaǵa berilmegennen keıin barlyq kommýnaldyq shyǵyndardy fırmanyń ózi tólep jatyr. Úıdiń astynda ortaq esepteýish quraldary bar. Sodan bárin kórýge bolady. Adamdar páterlerin jóndeıdi, kúl-qoqys shyǵarady, jaryq pen sýdyń shyǵyndary taǵy bar. Biz turmaı jatqan adamdardan aqsha jınap jatqan joqpyz. Úıge kirgenderden jınap jatyrmyz. Qazir olar kommýnaldyq tólemderdi resmı túrde aýdaryp jatqan  joq. Bárin kompanııa tólep jatyr. Sol sebepti biz bir rettik alymdy jınaǵandy jón kórdik. Qazir 56 páterdiń 70 paıyzy turyp jatyr. Solardyń bárine fırmanyń ózi tóleýge májbúr», - dedi E.Úderbekov QazAqparat tilshisine bergen suhbatynda.