Astana turǵyny kólikke «joldy bógemeńder» dep jazǵany úshin 80 myń teńge tóledi
ASTANA. QazAqparat - Astana turǵyny kóligine «shyǵaberis joldy bógemeńder» degen jazý qaldyrǵan adamnan zalal somasyn óndirip aldy, dep habarlady QR Joǵary sotynyń baspasóz qyzmeti.
Er adam kóligin elordadaǵy turǵyn úılerdiń biriniń mańyna qoıǵan, qaıtyp kelgen ol júrgizýshi jaqtaǵy esikten «shyǵaberis joldy bógemeńder» degen jazýdy oqıdy. Artynsha er adam polıtsııaǵa shaǵymdanady.
"Quqyq qorǵaý organynyń ókilderi osy jazý arqyly áıel kólikke zaqym keltirdi degen baılamǵa keldi", delingen habarlamada.
Astana Saryarqa aýdandyq soty talaparyzdy ishinara qanaǵattandyrdy. Múlikke zııan keltirgeni úshin áıelge 83 947 teńge aıyppul salyndy.
Sheshim zańdy kúshine endi.
