Astana turǵyny kóliginen kıik múıizderi tárkilendi
ASTANA. QazAqparat - «Atyraý - Astrahan» tas joly boıyndaǵy kólikten kıik múıizderi tabyldy. Bul týraly QR QOSRM baspasóz qyzmetiniń málimetinde habarlandy.
«2014 jyldyń 1 sáýirinde «Atyraý - Astrahan» tas joly boıyndaǵy «Novobogat» baqylaý-ótkizý beketinde «Bekire-2014» balyqtardy qorǵaý is-sharalaryn júrgizý barysynda Astana qalasynyń turǵyny júrgizip kele jatqan «Toyota Camry» markaly avtokólik tekserildi. Nátıjesinde avtokóliktiń ishinen qapqa salynǵan 81 dana kıik múıizderi tabylyp, tárkilendi», - delingen taratylǵan málimette. Oqıǵa boıynsha tergeý amaldary júrgizilip jatyr.
Bıylǵy 1 sáýir men 31 mamyr aralyǵynda elimizdiń qorshaǵan orta jáne sý resýrstary, ishki ister, kólik jáne kommýnıkatsııalar mınıstrlikteri men ulttyq qaýipsizdik komıteti birlesip, keń aýqymdy «Bekire -2014» balyq qorǵaý aktsııasyn ótkizedi. Atalǵan shara balyqty zańsyz aýlap, satýǵa jáne tasymaldaýǵa jol bermeý maqsatynda ótkiziledi.
