Astana turǵyny kóligin qaıda qaldyrǵanyn umytyp polıtsııany shaqyrǵan
ASTANA. QazAqparat - Aıaz qysqan kúnderi astanalyq turǵyn óziniń kóligin qaıda qaldyrǵanyn umytyp, aqyry tártip saqshylaryn shaqyrǵan, dep habarlaıdy «QazAqparat» HAA tilshisi.
Bolǵan oqıǵaǵa baılanysty Astana turǵyny elordanyń polıtsııa basshysyna alǵys hat jazypty.
«22 qańtar kúni saǵat 14.00 shamasynda Saýran kóshesiniń №3 úıi mańynda jeke avtokóligimdi turaqqa qoıdym. Kóligimdi qaldyrǵan boljamdy jerge 2 saǵattan keıin oralyp, ony taba almadym», - dep jazady elorda turǵyny.
Óziniń avtokóligin izdep sarshunaq aıazda álgi adam birshama aýlany aralap ketse kerek. -36 gradýs aıazda kóligin tappaǵan ol aıtarlyqtaı tońyp qalǵan kórinedi.
Aqyry, astanalyq 102 nómirine habarlasyp, bolǵan jaıdy baıandap beredi. Keıin ózi avtokólikti «endi taba almaımyn» dep oılaǵanyn moıyndapty.
«Biraq, qatty qatelesippin. Birneshe mınýttan keıin-aq maǵan habarlasyp, turǵan jerimde patrýl kóligin kútý kerektigi aıtyldy. Sóıleskennen keıin telefonymdy qaltama salyp úlgermeı, patrýl kelip jetti. Іshindegi tártip saqshylary meni otyrǵyzyp alyp, menen tıisti málimetterdi alǵannan keıin ortalyq beınebaqylaý pýnktine habar berdi. Ózderi aýlalalardy aralap izdeı bastady. Qýanyshyma qaraı, arada 5 mınýt óter-ótpesten kóliktiń qaıda turǵany týraly ortalyq beınebaqylaý pýnktinen habar jetti. Kóp ýaqyt ótpeı óz kóligime qaıta jaıǵastym», - deıdi ol.
Er adam joǵary kásibı jumysy úshin ortalyq beınebaqylaý pýnkti men patrýl qyzmetkerlerine alǵys jarııalaýdy surap otyr.
