Astana turǵyny bir aıda jedel járdemdi 106 ret shaqyrǵan
ASTANA. QazAqparat - Astanada 86 jastaǵy keıýana bir aıdyń ishinde 106 ret jedel járdem shaqyrdy, dep habarlaıdy QazAqparat Elorda Info saıtyna silteme jasap.
«Jedel járdemdi jıi shaqyratyn naýqastar bar. Ótken jyly 86 jastaǵy naýqas jedel járdem brıgadasyn bir aıda 106 ret shaqyrdy. Biz onyń meken-jaıyn jatqa bilemiz. Ár shaqyrtýyna bardyq. Sebebi, ol keýdesiniń júrek tusy aýyratynyn aıtyp shaǵymdandy. Oǵan qosa, sozylmaly aýrýlary da kóp. Barmaı qalý - qaýipti», - dedi Qalalyq jedel medıtsınalyq járdem stansasynyń aqparattyq-shuǵyl dıspetcherlik bóliminiń basshysy Bota Sádethan.
Onyń aıtýynsha, keıýana qarttar úıine ornalastyrylǵan soń, shaqyrtý toqtady.
2017 jyly «Jedel medıtsınalyq járdem qyzmeti týraly» jańa buıryq bekitildi. Soǵan sáıkes shuǵyl jedel járdem shaqyrtýlary tórt sanat boıynsha saralanatyn bolady. Jedel járdem formatyn ózgertýge sozylmaly aýrýlar boıynsha shaqyrtýlardyń kóbeıýi sebep boldy.
«Qazir biz tórt sanat boıynsha jumys isteımiz. Jedel járdemdi jıi shaqyratyn naýqastardy emhanalarǵa tapsyrdyq. Ondaı naýqastarǵa emhanalardaǵy jedel járdem brıgadalary nemese ýchaskelik dáriger barady. Osylaısha, jedel járdem brıgadalarynyń júktemesi azaıyp, sáıkesinshe naýqastarǵa jetý ýaqyty qysqardy», - dedi Bota Sádethan.
Aıta keteıik, búginde «103» telefon nomerine 2,5 myńǵa jýyq qońyraý túsedi. Jedel járdem brıgadalary olardyń 1,5 myńǵa jýyǵyna barady.
