Astana turǵyny áleýmettik jelidegi jazbasy úshin sottaldy

ASTANA. QazAqparat - Facebook-te sheteldik jumysshylarǵa ozbyrlyq jasaýǵa shaqyryp, jazba qaldyrǵan elordalyq azamat sottaldy. Bul týraly búgin baspasóz máslıhaty barysynda Esil aýdandyq №2 soty tóraǵasynyń mindetin atqarýshy Qanat Tobaǵalıuly aıtty, dep habarlaıdy QazAqparat tilshisi.

Este bolsa, ótken jyldyń kúzinde elordada salynyp jatqan «Ábý-Dabı Plaza» kesheni aýmaǵynda kúzet kompanııasynyń qyzmetkerleri men sheteldik jumysshylar  arasynda janjal týyndaǵan bolatyn. Sol kezde elordalyq azamat áleýmettik jelidegi paraqshasynda turǵyndardy sheteldik jumysshylarǵa  qarsy ozbyrlyq jasaýǵa shaqyrǵan jazba qaldyrǵan edi.

«Astanalyq QR Qylmystyq kodeksiniń 174-baby («Áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý»)  boıynsha kináli dep tanyldy. Ol beıbit ýaqytta Facebook-taǵy jazbasy arqyly qalalyqtardy atalǵan sheteldik tulǵalarmen esep aıyrysýǵa jáne tártipti buzýǵa shaqyrdy», - dedi Qanat Tobaǵalıuly.

Onyń atap ótýinshe, atalǵan tulǵa kináli dep tanylyp, oǵan 2 jylǵa bas bostandyǵynan aıyrý jazasy belgilengen. Degenmen, isti apellıatsııalyq satyda qaraý barysynda jaza merzimi 1 jylǵa deıin tómendetilgen.