Astana turǵyny Aqmola oblysynda adam ólimimen aıaqtalǵan JKO úshin ustaldy
ASTANA. QazAqparat - Aqmola oblysy Tselınograd aýdanynda adam ólimimen aıaqtalǵan jol-kólik oqıǵasyna kináli elorda turǵynyna qatysty qylmystyq is qozǵaldy.
30 shildede Tselınograd aýdandyq ishki ister bólimine «Astana-Kıevka» jolynyń Qabanbaı batyr aýylynyń mańynda «Hýndaı Aktsent» markaly avtokóligi jaıaý júrginshilerdi qaǵyp ketip, oqıǵa ornynan jasyrynǵany týraly telefon arqyly habarlama tústi. Jedel járdem jetkenshe, JKO saldarynan zardap shegýshilerdiń biri qaza boldy. Al taǵy bir adam alǵan jaraqattarynan emdeý mekemesine jetkizildi, dep habarlady Amola oblysy ІDD baspasóz qyzmetinen.
Belgili bolǵandaı, atalǵan qaıǵyly oqıǵanyń aldynda zardap shegýshiler (26 jastaǵy júrgizýshi men 29 jasar jolaýshy) jol boıynyń jıeginde «Shansıman» júk kóliginiń dóńgelegin aýystyryp jatqan eken. Adamdardy qaǵyp ketkennen keıin, jeńil kóliktiń júrgizýshisi izin jasyrǵan.
Sol kúni polıtseıler jeńil kóliktiń ıesi anyqtady. Jedel izdestirý sharalarynyń barysynda Astana qalasynyń 23 jasar turǵyny ustaldy. Sonymen qatar medıtsınalyq kýálandyrý kezinde ustalǵan azamat kólikti ortasha dárejedegi masaıǵan kúıinde basqarǵany anyqtaldy. Munymen qosa, aǵymdaǵy jyldyń mamyrynda sot sheshimen ol 36 aı merzimge avtokólikti basqarý quqyǵynan aıyrylǵan kórinedi.
Qazirgi kezde atalǵan jol-kólik oqıǵasy boıynsha qylmystyq is qozǵaldy. Sanktsııaǵa sáıkes, kúdikti bes jyldan jeti jylǵa deıin bas bostandyǵynan aıyrylýy múmkin.
