Astana turǵyny 20 myńnan astam markadan kollektsııa jınaǵan
ASTANA. QazAqparat - Kollektsıoner Amanjol Qadyrovtyń maqtanyshy qazaqstandyq belgili sportshy - olımpıadashylardyń jeke qoltańbalary bar konvertteri. Onyń qolyndaǵy asa qundy markalary 1933 jyly shyqqandary, dep habarlaıdy Astana qalasy ákimdiginiń resmı saıty.
Qazir Astana turǵynynyń kollektsııasynda 20 myńnan astam marka bar. Marka jınaý áýestigi 1974 jyly stýdent bolyp júrgende bastalǵan. Qadyrovtyń markalary ishindegi maqtanyshy qazaqstandyq belgili sportshy - olımpıadashylardyń jeke sýretteri bar konvertteri. Ol ár sportshyǵa marka jabystyrylǵan sýreti bar konvertter jibergen. Sóıtip onyń qolyna ár sportshynyń qoltańbasy bar konvertter jınaqtalǵan.
«Men úshin bular óte qymbat. Hat jazyp jibergen soń jaýaptaryn asyǵa kúttim. Hat jazyp jibergende olardyń sýretteri bar konvertterdi marka jabystyryp birge jiberip otyrdym. Al sportshylardan jaýap hat alý bir qýanysh bolatyn», - deıdi A. Qadyrov.
Qazir fılatelıste Aleksandr Vınokýrov, Ilıa Ilın, Maııa Maneza, Serik Sápıev, Dmıtrıı Balandın jáne basqa da sportshylardyńqoltańbalary bar konvertter saqtaýly.
Aıta keteıik, markalar arnaıy albomda nemese klıasserde saqtalady. Olardy saqtaýdyń ózindik tásili bar.
- Olardy ylǵal joq jerde kóldeneńinen saqtaý qajet. Úlken konvertter men markalar blogyn saqtaý úshin men arnaıy mashınka oılap taptym, ol qaǵazǵa arnalǵan qarapaıym faıldardyń jan jaǵyn jabystyrady. Osylaısha bir jaǵy ashyq qalady, ashyq qalǵan jaqtan qajetti danasyn alyp otyramyn, - deıdi ol.
Onyń jospary kollektsııasyn urpaǵyna qaldyrý. Óıtkeni, mundaı qyzyǵýshylyq oı-órisin keńeıtý ǵana emes, zattarǵa uqyptylyqpen qaraýdy úıretedi.
