Astana turǵyndarynyń sany 780 myń adamǵa jetti
ASTANA. 13 naýryz. QazAqparat - Astana turǵyndarynyń sany 780 myń adamǵa jetti. Bul týraly astana.kz saıtyna qalalyq Statıstıka departamentinen málim etti.
«2013 jyldyń 1 aqpanyndaǵy málimette Astana qalasy halqynyń sany aǵymdaǵy esep boıynsha 780 880 adamǵa jetti. Onyń ishinde Almaty aýdany boıynsha - 363 545 (46,6%), Esil aýdany boıynsha - 103 438 (13,2%), Saryarqa aýdany boıynsha - 313 897 (40,2%) adam»,- delingen taratylǵan aqparatta.
2013 jyldyń basyndaǵy kezeńimen salystyrǵanda Astana halqynyń jalpy sany 2 797 adamǵa kóbeıgen. Sonyń ishinde Saryarqa aýdanynda - 2 106 adamǵa, Esil aýdanynda - 721 adamǵa artsa, Almaty aýdanynyń turǵyndary sany 30 adamǵa azaıǵan.
Belgili bolǵandaı, Astana turǵyndary sanynyń ósýi negizinen kóshi-qonnyń esebinen bolyp otyr.
Eske salaıyq, 2013 jyldyń qańtarynda halyqtyń tabıǵı ósimi 1542 adam, kóshi-qon esebinen - 1255 adamǵa kóbeıgen bolatyn.
