Astana turǵyndarynyń narazylyǵyn týdyrǵan jol qıylysyna baǵdarsham ornatylady
NUR-SULTAN. QazAqparat – Nur-Sultan qalasynyń ákimdigi jol kólik qozǵalysy qaýipsizdigine alańdaǵan turǵyndardyń ótinishine jaýap berdi, dep habarlaıdy QazAqparat tilshisi.
Elorda turǵyndary Q. Muhamedhanov kóshesiniń boıyndaǵy jol qıylysyna baǵdarsham ornatyp, kólik qozǵalysyn retteýdi suraıdy.
Qalalyq ákimdiktiń baspasóz qyzmeti Q.Muhamedhanov kóshesi men Turan dańǵyly qıylysynda baǵdarshamdar qoldanystaǵy zııatkerlik kólik júıesiniń (ITS) quramyna kiretinin habarlady. Qıylysatyn baǵyttardyń basymdyǵy boıynsha sheshim kólik aǵyny qozǵalysynyń qarqynyn aıqyndaý arqyly avtomatty túrde qabyldanady.
Sondaı-aq, resmı jaýapta jyl sońyna deıin BI City Tokyo jáne Manhattan turǵyn úı kesheni aýdanynda baǵdarshamnyń ornatylatyny aıtylǵan.
Odan bólek, turǵyndar qoǵamdyq kólik máselesin de qozǵap otyr. Aıtýlarynsha, jolaýshylardy kósheniń qıylysyna túsirip ketedi. Ol jerde qoǵamdyq kólik belgisi bar, biraq aıaldama joq.
«Aıtmatov kóshesi boıyndaǵy «Pamır» jáne «Seýl» turǵyn úı kesheni mańyndaǵy aıaldamany jelden qorǵaıtyn kútý pavılonyn ornatý qarastyrylǵan. Jobany iske asyrý 2022-2023 jyldarǵa belgilenip otyr», - delingen resmı saýal jaýabynda.
Turǵyndardyń málimdeýinshe, atalǵan aýdanda «Sergek» beınebaqylaý kamerasy da joq.
«Búgingi tańda joba aıasynda «Sergek» apparattyq-baǵdarlama kesheni ornatylǵan. Jobany keńeıtý jáne qarjylandyrý jaǵdaıynda Nur-sultan qalasynyń polıtsııa departamentimen kelisý kezinde osy mekenjaı boıynsha «Sergek» AÓK qosymsha ornatý júzege asyrylady», - dep tolyqtyrdy qalalyq kólik jáne jol-kólik ınfraqurylymyn damytý basqarmasynan.
