Astana turǵyndarynyń kópshiligi Sammıt kúnderi qala syrtyna shyǵýdy josparlaýda
ASTANA. 1 jeltoqsan. QazAqparat /Gúlnár Jandaǵulova/ - Astana ákimdiginiń resmı saıtynda júrgizilgen saýalnamanyń qorytyndysy boıynsha, elorda turǵyndarynyń kópshiligi Sammıt kúnderi, 1-2 jeltoqsanda qala syrtyna shyǵýdy josparlap otyr.
Saýalnamaǵa qatysqandardyń 25 paıyzy, qaladan tysqary jerlerge shyǵýdy josparlap otyrǵandaryn aıtsa, 23 paıyzy demalysty balalarymen ótkizetinin, taǵy 15 paıyzy úı sharýasymen shuǵyldanatyndyǵyn jetkizgen. Respondentterdiń 12 paıyzy bul kúnderi kınoǵa nemese saýda-demalys ortalyqtaryna barmaq. Jáne Sammıt kúnderi demalys jarııalanǵanyna qaramastan, elordalyqtardyń taǵy 11 paıyzy jumystarynda bolady. Astanalyqtardyń taǵy 7 paıyzy EQYU sammıtin uıymdastyrýǵa jáne ótkizýge atsalyssa, 1 paıyzy demalysqa shyqpaq.
Budan buryn habarlaǵandaı, Astana sammıtine 38 eldiń memleket jáne úkimet basshylary, bir vıtse-prezıdent, jeti úkimet tóraǵalarynyń orynbasary, 14 mınıstr jáne basqa da joǵary laýazymdy sheneýnikter qatysady. Astanaǵa sondaı-aq úsh syrtqy ister vıtse-mınıstri - Marokko, Týnıs jáne Japonııa elderiniń vıtse-mınıstrleri keledi. 38 halyqaralyq jáne aımaqtyq uıymnyń basshylary men ókilderi sammıtke qatysý nıetterin qýattady. Atap aıtqanda, elordamyzǵa BUU Bas hatshysy Pan Gı Mýn, AQSh Memlekettik hatshysy Hılları Klınton, EQYU Parlamenttik Assambleıasynyń tóraǵasy Petros Eftımıý, EQYU Bas hatshysy Mark Perren de Brıshambo keldi. Sammıtke Aýǵanstan Prezıdenti Hamıd Karzaı da qatysqaly otyr.
