Astana turǵyndaryna tegin tis protezdeý qyzmeti kórsetiledi
ASTANA. QazAqparat - Jyl saıyn Elordada Astana qalasy máslıhatynyń 2014 jylǵy 27 maýsymdaǵy sheshimimen bekitilgen «Astana qalasynda áleýmettik kómek kórsetý, onyń mólsherin belgileý jáne muqtaj azamattardyń jekelegen sanattarynyń tizbesin aıqyndaý qaǵıdasyna» sáıkes tis protezdeý túrinde tegin qyzmet kórsetý qarastyrylǵan, dep habarlaıdy qalalyq ákimdiktiń baspasóz qyzmeti.
Atap aıtqanda, jeńildikter Uly Otan soǵysynyń qatysýshylary men múgedekterine, solarǵa teńestirilgen adamdarǵa, jasy boıynsha zeınetkerlerge, múgedekterge usynylady. Uly Otan soǵysynyń qatysýshylary men múgedekterine qyzmetter kezekten tys kórsetiledi. Qalǵan sanattardaǵy azamattarǵa qyzmetter kezek retimen usynylady.
Áleýmettik kómek alý úshin ótinish berýshi Astana qalasynyń jumyspen qamtý, eńbek jáne áleýmettik qorǵaý basqarmasyna ótinishpen birge jeke basyn kýálandyratyn qujattyń kóshirmesin, meken jaı anyqtamasyn, mártebesin rastaıtyn qujattyń kóshirmesin, ýákiletti medıtsınalyq uıym bergen tis protezdeý qajettiligi jónindegi medıtsınalyq qorytyndy usynady.
Tisti protezdeýge áleýmettik kómek eki jylda bir ret kórsetiledi. Atalǵan áleýmettik kómek sheńberinde medıtsınalyq kórsetkishter bolǵan jaǵdaıda aýyz qýysyna arnalǵan em-dom sharalary atqarylady. Tolyq aqparat alý úshin Imanbaeva kóshesi, 16, tel. 21-27-14, 21-09-41, 21-29-88 meken jaıy boıynsha Astana qalasynyń jumyspen qamtý, eńbek jáne áleýmettik qorǵaý basqarmasyna habarlasýǵa bolady.
