Astana turǵyndaryna aýyz sý tapshylyǵy týraly eskertilýde
ASTANA. QazAqparat -Astana qalasyndaǵy aıaldamalarda sý tapshylyǵy máselesine arnalǵan bannerler iline bastady.
«Óte taıaý keleshekte-aq Qazaqstanda aýyz sý tapshylyǵy oryn alýy múmkin» degen taqyryppen ilingen aqparattyń ishinde aýyz sýdy únemdeýdiń utymdy ádisteri kórsetilgen, dep habarlaıdy «QazAqparat» HAA tilshisi.
Búginde qalanyń bir turǵyny jylyna 20 myń lıtr sýdy rásýa etip, káriz jelilerine aǵyzyp otyrady. Sebebi qarapaıym únemdeý sharalary saqtalmaıdy. Osy oraıda, banner avtorlary kelesi keńesterdi berip otyr: vannanyń ornyna dýsh qabyldańyz; tamshylap turǵan shúmekterdi der kezinde jóndep turyńyz; tańerteń tis tazalaǵanda sýdy jaýyp otyryńyz, durysy, tis jýǵanda sýdy arnaıy staqanǵa quıyp alyp otyrǵan jón; ydys jáne kir jýǵysh mashınalardy tolǵan kezde ǵana paıdalanyńyz; tamaq iship bolǵan soń, ydys-aıaqty taǵam qaldyqtary jabyspaı turǵanda jýyńyz, sonda sýdy azyraq ketiretin bolasyz; sý bagynda eki túımesi bar ýnıtazdy ornatqan durys; shúmekter men dýshqa aerator sııaqty sý únemdeý quraldaryn ornatyńyz.
Aıta keteıik, búgingi kúni Qazaqstan úshin aýyz sý máselesi asa ózekti bolyp tur. Sebebi elimizdegi ózen-sýlardyń barlyǵy syrttan keledi.
