Astana turǵyndary jalǵan elektr mamandary týraly eskertildi
ASTANA.QazAqparat - «Astanaenergoservıs» AQ Facebook-tegi resmı paraqshasynda ataýy birdeı uıymnyń qala turǵyndaryn órt paıda bolady dep qorqytyp, elektr symdaryn aýystyrý qyzmetin usynyp júrgen zańǵa qaıshy áreketteri týraly eskertti, dep habarlaıdy «QazAqparat» HAA.
«Bizge elorda turǵyndarynan kompanııalardyń biriniń áreketterine baılanysty biraz shaǵymdary kelip túsken. Atalǵan uıym kompanııamyzdyń ataýyn paıdalanyp, halyqqa elektr symdaryn tekserý jáne aýystyrý qyzmetin usynyp júr. Bul uıymnyń «Astanaenergoservıs» AQ-ǵa esh qatysy joq ekenin atap ótý kerek. Bizdiń kompanııa páterlerde elektr symdaryn teksermeıdi, aýystyrmaıdy. «Astanaenergoservıs» AQ kompanııalar toby jylý jáne elektr energııasyn óndirý jáne tasymaldaýmen aınalysady», - delingen habarlamada.
«Turǵyndar qyzmetin usynǵan uıymnyń olardy eger elektr symdaryn aýystyrmasa, órt paıda bolady dep qorqytqanyn aıtty. Eń kóp shaǵym zeınetkerler, balalar men nemerelerden kelip tústi», - dep habarlady «Astanaenergoservıs».
Kompanııa turǵyndardy qyraǵylyq tanytýǵa shaqyrdy. ıAǵnı qujattardy tekserip otyrý, symdardyń aqaýy bar ekenine kóz jetkizbeı qyzmet kórsetýge kelispeý, qyzmet kórsetetin uıym, kommýnaldyq qyzmetke júginý, al aldanǵanyn sezse - birden polıtsııaǵa shaǵymdaný kerek.
