Astana turǵyndary úshin 30 smart-servıs jumys isteıdi

ASTANA. QazAqparat - Astana qalasynyń turǵyndary úshin 12 kategorııa boıynsha 30 smart-servıs jumys isteıdi. Bul týraly «Astana Innovations» AQ basqarma tóraǵasy Oljas Sartaev Astanada ótken dóńgelek ústelde málim etti, dep habarlaıdy QazAqparat HAA tilshisi.

«Smart-Astana» veb-portaly men mobıldik qosymshasy qoldanýshylarǵa elordanyń basty smart-servısterine qoljetimdilik berý maqsatynda qurylǵan. 7 maýsym kúni joba jańartyldy jáne iske qosyldy. Jalpy alǵanda, qazirgi ýaqytta 12 sanat boıynsha 30 qyzmet jumys istep tur. Olardy 113 myńnan astam turǵyn mobıldik qurylǵylaryna júktep alǵan», - dedi O.Sartaev.

Onyń aıtýynsha, Astananyń 109 qyzmetine ótinish berý protsessin avtomattandyrý, mobıldik qosymshalar arqyly halyqtyń jergilikti atqarý organdarymen baılanysyn jaqsartý jáne jyldamdatý ıntellektýaldyq assıstentterdiń negizi boldy.

Sondaı-aq, «Astana Innovations» basshysy páter ıeleri kooperatıviniń jumysyn avtomattandyrý jáne turǵyndar pen kooperatıvtiń ózara árekettestigin ońtaılandyrý boıynsha qolǵa alynǵan e-KSK jobasy týraly aıtyp berdi. Máselen, endi páter ıeleri kooperatıvine baryp, jınalysqa qatysýdyń qajeti joq. Sondaı-aq, e-KSK kómegimen basqarýshy kompanııalar men PIK qarjylyq esebin baqylap otyrýǵa bolady. Atalǵan joba ázirge Astanadaǵy 436 kooperatıvtiń 255-in, ıaǵnı 1 200 turǵyn úıdi qamtyp otyr.