Astana turǵyndary ulttyq mádenı birlestikteri shyǵarmashylyq ujymdarynyń ónerin tamashalaýda
ASTANA. 1 mamyr. QazAqparat - Búgin elorda ákimdigi aldyndaǵy alańda Qazaqstan halqynyń birligi kúnine arnalǵan negizgi sharalar ótip jatyr.
Atap aıtqanda, onda ulttyq mádenı birlestikter shyǵarmashylyq ujymdarynyń qatysýymen «Dúnıe-dýman» atty merekelik kontsert ótip jatyr. Alańǵa jıylǵan jurtshylyq aldynda Qazaqstan halqynyń dostyǵy men birligine negizdelgen «Dostyq salt-dástúr» atty horeografılyq qoıylym arqyly elimizde turatyn barlyq etnos ókilderi óz ónerlerin pash etti.
Aıta keteıik, «Terra» bı teatry, Faıza Gaskarov atyndaǵy memlekettik akademııalyq halyq bı ansambli, «Irada» bı ansambli, «Bahar» ansambli, «Alash uly» toby, «Premıým» kvarteti syndy shyǵarmashylyq ujymdary óner kórsetti.
Osy dýmandy sharany Úkimet músheleri, Parlament depýtattary, belgili qoǵam qaıratkerleri de tamashalaýda.
Búgin budan bólek Qarjy mınıstrligi aldyndaǵy alańda, M. Ótemisov atyndaǵy oqýshylar saraıynyń mańynda, sondaı-aq qaladaǵy saıabaqtarda buqaralyq serýender ótip jatyr. Osy kúni teatrlandyrylǵan qoıylymdar, merekelik kontsertter, festıvaldar men kópshilik sherýler uıymdastyrylady. Merekege kelýshiler alańdarda ornalasqan etnomádenı ortalyqtardyń kórme shatyrlaryn aralap, qoldanbaly ónerimen, turmystyq zattarymen, ulttyq mýzyka aspaptarymen tanysyp, tamashalaı alady.
