Astana turǵyndary kópqabatty úıdiń terezesinen qulaǵaly turǵan sábıdi qutqaryp qaldy
ASTANA. QazAqparat - Astana turǵyndary joǵarǵy qabatta ornalasqan páterdiń terezesine shyǵyp ketken jas balany qutqaryp qaldy, dep habarlaıdy QazAqparat.
Oqıǵanyń beınejazbasyn Feısbýk qoldanýshylary jelige júktedi. Onda «Gazel» júk kóliginiń ústinde eki jigit bireýin kóterip turyp, úshinshi qabattyń ashyq terezesi aldynda turǵan sábıdi din-aman jerge túsiredi. Avtordyń habarlaýynsha, sábı ata-anasynyń qaraýynsyz qaldyryp ketken.
«Búgin sumdyq jaǵdaıdyń aldyn alǵan oqıǵanyń kýási boldym. Astana qalasyndaǵy úılerdiń birinde terezede ilinip otyrǵan búldirshindi ımanjúzdi jigitter aman alyp qaldy. Bizge belgili bolǵany, ata-anasy úıinde bolmaǵany (avtordyń stıli saqtaldy - red.)», - dep jazdy jeli qoldanýshysy Laýra Hamytqojaeva .
Aıta keteıik, elordalyq ІІD-niń baspasóz qyzmetiniń habarlaýynsha, ótken jyly Astanada 16 bala terezeden qulap ketken.
«Kópqabatty úılerdiń terezesinen qulaý balalar jaraqatynyń negizgi sebebine aınalýda. Kóp jaǵdaıda jazataıym oqıǵalar shybyn-shirkeıden qorǵaıtyn torlarǵa baılanysty oryn alady. Olar balalardy qulaýdan qorǵaı almaıdy! Moskıtti torǵa súıengen bala, onymen birge jerge qulaıdy», - deıdi astanalyq ІІD.
Qaıǵyly oqıǵalardy boldyrmaý úshin terezege bala ózdigimen asha almaıtyn buǵattaýyshtar ornatý qajet. Budan basqa, jıhazdardy da terezeden alysyraq qoıǵan jón.
