Astana turǵyndary izdeý jarııalanǵan kúdiktini quryqtaýǵa kómektesti
ASTANA. QazAqparat - Astana turǵyndarynyń kómegimen sıntetıkalyq esirtkini taratatyn ınternet-saıttardy jarnamalaǵany úshin izdeýde júrgen kúdikti ustaldy. Bul týraly elordalyq Polıtsııa departamentiniń baspasóz qyzmeti málim etti, dep habarlaıdy Qazaqparat.
Elorda aýmaǵynda esirtkimen kúres baǵytynda polıtseıler jedel-izdestirý sharalaryn júrgizdi. Onyń aıasynda esirtkini taratýǵa qatysty saıttardy jarnamalaýǵa úles qosqan adamdardy quryqtaý jumystary atqaryldy.
Belgili bolǵandaı, jaqynda Astanadaǵy turǵyn úılerdiń kireberisterinde sıntetıkalyq esirtkini taratatyn saıttardyń jarnamasy jazyla bastady. Polıtsııanyń málimetinshe, jarnamada kórsetilgen zattar óte qaýipti, ıaǵnı olar adamnyń esirtkige táýeldiligin birden týdyrady.
«Turǵyndardyń belsendi azamattyq pozıtsııasynyń arqasynda osy jazbalardyń avtoryn anyqtap, ustaý múmkindigi týdy. Bul zańsyzdyqqa qatysty Almatynyń 32 jastaǵy turǵyny kúdikke ilindi. Ol buǵan deıin esirtkiniń zańsyz aınalymyna qatysty qylmystyq áreket úshin jaýapty bolǵan. Polıtsııa jazbalarda kórsetilgen saıtty shuǵyl túrde buǵattady», - dedi tártip saqshylary. 
Polıtsııa ókilderiniń atap ótýinshe, esirtki taratýshylar kún saıyn jańa tásilder oılap shyǵarýda. Osy oraıda saıttardy jarnamalaǵan jazbalar zańsyz sanalady.
2018 jyldan qazirgi ýaqytqa deıin polıtseıler osyndaı 120 saıtty anyqtap, buǵattady.
Tártip saqshylarynyń málimetinshe, kóbine úılerdiń qabyrǵasy men kireberisterindegi saıttardyń jarnamasy týraly aqparatty qala turǵyndary habarlaıdy. Bul óz kezeginde zańsyz saıttardy buǵattaý protsesin jyldamdatady.
