Astana turǵyndary bir táýlikte qansha kólemde sý tutynady

ASTANA. QazAqparat – 2026 jylǵa qaraı Astana halqy táýligine 340 myń tekshe metr sý tutynýy múmkin. Mundaı boljam Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdama-jobasynda jasalǵan, dep habarlaıdy QazAqparat tilshisi.

«Elordanyń qarqyndy damýyna, sondaı-aq halyq sanynyń únemi artyp otyrýyna baılanysty Astana qalasyn sýmen qamtamasyz etý ózekti másele bolyp otyr. 2018 jyly elorda turǵyndarynyń sý shyǵyny táýligine 269 myń tekshe metr, 2022 jyly táýligine 311 myń tekshe metrdi qurady. Qalada turǵyn úılerdiń belsendi salynýyn eskere otyryp, 2026 jylǵa qaraı sý tutyný táýligine 340 myń tekshe metrge jetedi degen boljam bar», - delingen Ashyq NQA portalynda jarııalanǵan tujyrymdamada.

Qujatta kórsetilgendeı, bas shaharda aýyz sýdyń rezervtik kózin qurý mańyzdy. Ol naqty sharalar qabyldaýdy talap etedi.

«Qazirgi ýaqytta elordany sýmen jabdyqtaý jalǵyz kózden – 1969 jyly salynǵan jáne 500 myń adamǵa eseptelgen Astana sý qoımasynan júzege asyrylady. Qala halqy 1,3 mln adamǵa jetti. Astana qalasy úshin aýyz sýdyń rezervtik kózin qurý jóninde sharalar qabyldaý qajet», - delingen 6 jyldyq josparda.

Sonymen birge Esildiń lastaný problemasy da jazylǵan. Atap aıtqanda, búginde ózendi fenol, sýspenzııa, magnıı sııaqty zattar búldirip jatyr.

Tujyrymdama jobasy 20 maýsymǵa deıin kópshilik talqylaýda bolady.