Astana turǵynynyń páterinen 100-den astam esirtki dozasy tabyldy
ASTANA. KAZINFORM — Elordada polıtseıler jedel-profılaktıkalyq is-sharalar barysynda esirtki zattaryn saqtaý faktisin anyqtady, dep habarlaıdy Polisia.kz.
28 jastaǵy er adamnyń páterindegi shkaftardyń birinen taratýǵa arnalǵan, aldyn ala bólshektelip salynǵan esirtki zaty bar plastık tútiksheler tabyldy. Barlyǵy 100-den astam bólshektelgen kannabıs shaıyrynyń dozasy, sondaı-aq osyǵan uqsas zat salynǵan ydys, elektrondy tarazy jáne esirtkini ólshep, býyp-túıýge paıdalanylǵan ózge de zattar tárkilendi.
Tárkilengen esirtki zattarynyń jalpy salmaǵy bir keliden asty.
Atalǵan fakti boıynsha qylmystyq is qozǵaldy. Kúdikti ýaqytsha ustaý ızolıatoryna qamaldy.
Polıtsııa esirtki zattaryn saqtaý, daıyndaý jáne taratý qylmystyq jaýapkershilikke ákep soǵatynyn eskertedi. Zańsyz tabys úshin bostandyǵyńyzdy táýekelge tigýdiń qajeti joq — esirtki aınalymyna kez kelgen qatysý qatań jaýapkershilikke ákeledi.
Aıta keteıik, Almatyda esirtki saýdasyna daıyndalǵan 130 orama tárkilendi.
