Astana turǵyny jınalǵan qardan túrli músin jasap, jurtty tánti etip júr

ASTANA. KAZINFORM — Elordada turatyn Irık Shaımerdenov jumys ornynyń aldynan jınaǵan qardy naǵyz óner týyndylaryna aınaldyryp júr. Bul týraly Anadolý agenttigi jazdy.

Qysy qatal qaladaǵy qoǵamdyq tamaqtaný jelisine qarasty meıramhanalardyń birinde aýla sypyrýshy bolyp jumys isteıtin Shaımerdenov óz kásibin erekshe hobbımen ushtastyra bildi. Qardan jasaǵan músinderiniń arqasynda ol qysqa ýaqyt ishinde kóshede de, áleýmettik jelilerde de tez tanymal boldy.

Anadolý agenttigine bergen suhbatynda 60 jastaǵy Shaımerdenov meıramhanada bes jyldan beri jumys istep kele jatqanyn aıtty. Onyń sózinshe, úsh jyl buryn kireberis aldyndaǵy qardy tazalaý kezinde kishkentaı qar júrekterin jasaı bastaǵan, al keıin ol týyndylary kelýshilerdiń erekshe yqylasyna ıe bolǵan.

Mekeme ıesiniń qarsy emestigine kóz jetkizgen soń, ol óz bastamasymen jınalǵan qardan túrli músinder men fıgýralar jasaı bastaǵanyn aıtty.

I.Shaımerdenovtiń kásibı músinshilik bilimi joq ekenin, alaıda boıyndaǵy talanttyń áýletten daryǵanyn aıtady. Onyń ákesi sýret salýmen aınalysqan, al naǵashysy aǵasy kásibı sýret pániniń muǵalimi bolǵan eken.

Onyń aıtýynsha, jastyq shaǵynda dál sol aǵasynyń arqasynda ónerge bet burǵanymen, keıin jalǵastyrý múmkin bolmaǵan.

«Men anamnan erte aıyryldym. Ákem meni jáne baýyrlarymdy jalǵyz ózi ósirdi. Úlken bala bolǵandyqtan, otbasyǵa kómektesýim kerek boldy, sondyqtan jumysqa erte kiristim. Keıin óz shańyraǵymdy qurdym, balalardy asyraý qajet boldy. Mine, kózdi-ashyp jumǵansha jyldar zýlap óte shyqty», deıdi ol.

Shaımerdenov Astanada shamamen 20 jyldan beri turyp keledi. Ol arada kóp jyl ótken soń qaıta oıanǵan talanty ózine úlken qýanysh syılaıtynyn jasyrmady.

«Talant ishimde uıyqtap jatqandaı edi. Qaıta bastaǵan kezde ózimdi tapqandaı boldym. Qazir ózimdi de, kelip tamashalaıtyn balalardy da qýantyp júrmin», dedi ol.

Onyń aıtýynsha, eń úlken qoldaýshylary — balalary men nemereleri. Keıde nemereleri músin jasaýǵa kómektesedi, al olardyń qyzyǵýshylyǵy oǵan odan saıyn zor shabyt beredi.

Kóbine ol qardan janýarlardyń beınesin jasaıdy.

«Meniń eń úlken jankúıerlerim — balalar. Olardyń tańdanysy meni odan da qyzyqty músinder jasaýǵa jeteleıdi», deıdi ol.

Bir qar músinin jasaýǵa orta eseppen shamamen jarty saǵat ýaqyt ketedi, al asyqpaı jumys istegende bul úderis eki saǵatqa deıin sozylýy múmkin. Qural retinde negizinen kúrekti, keıde as úı jabdyqtaryn da qoldanady.

Shaımerdenov onyń týyndylaryn ádette eshkim búldirmeıtinin, al zaqymdanǵan nemese buzylǵan músinderdi ózi alyp tastaıtynyn aıtty.

Ol qysta qardy ermek qylsa, jazda qumnan músin jasaıdy eken. Onyń aıtýynsha, basty shabyt kózi retinde ishki seziminen qýat alady eken.

«Eger adamda talant bolsa, ony qansha jasyrsań da, bir kúni báribir syrtqa shyǵady», dedi Irık Shaımerdenov.

Aıta keteıik, Harbınde álemdegi eń úlken muz ben qar saıabaǵy ashylǵanyn jazdyq.