Astana turǵyny stalkıng úshin 80 saǵat qoǵamdyq jumysqa jegildi

ASTANA. KAZINFORM — Astanada bir turǵyn stalkıng úshin 80 saǵat qoǵamdyq jumysqa jegildi. Bul týraly qalalyq polıtsııa departamenti Qoǵamdyq qaýipsizdik basqarmasynyń bastyǵy, polıtsııa polkovnıgi Marat Ómirbaev brıfıngte habarlady.

— Bıyl Astanada stalkıng faktileri boıynsha 19 jaǵdaı tirkeldi, olardyń ishinde 6 jaǵdaı – otbasylyq-turmystyq salaǵa tıesili. Bir istiń soty boıynsha azamatqa 80 saǵat qoǵamdyq jumys taǵaıyndaldy, — dedi Marat Ómirbaev Astana qalasynyń kommýnıkatsııalar qyzmetinde ótken brıfıngte.

Polıtsııa ókilderiniń habarlaýynsha, stalkıng qurbandary kóbinese ajyrasqan áıelder bolady. Olardy kóbinese burynǵy kúıeýleri nemese burynǵy seriktesteri qýdalaıdy.

Ol sondaı-aq, stalkıngke ushyraǵan adamdar qýdalaýshymen eshqashan dıalogqa túspeý qajettigin eske saldy.

— Barlyq dálelderdi saqtaý – habarlamalar, skrınshottar, qońyraýlar – mańyzdy. Sondaı-aq jeke derekterge qoljetimdilikti shekteý, áleýmettik jelilerdegi qupııalyq parametrlerin ózgertý, 102 kanalyna habarlaý jáne quqyq qorǵaý organdaryna ótinishpen júginý qajet, — dedi polkovnık.

Osy joldar arqyly polıtsııa azamattarǵa stalkıngten qorǵanýdyń naqty sharalaryn usynady jáne qoǵamda psıhologııalyq qysymǵa nóldik tózbeýshilik qaǵıdatyn qalyptastyrýǵa kúsh salady.

Eske sala keteıik, budan buryn Batys Qazaqstanda stalkıng jasaǵan 2 adamnyń sottalǵanyn jazǵan edik.