Astana turǵyny kontsertke jalǵan bılet satqany úshin sottaldy
ASTANA. KAZINFORM — Astana turǵyny áleýmettik jelide kontsertke jalǵan bıletter satyp, eki adamdy aldaǵany úshin sottaldy. Jábirlenýshilerdiń biri kámeletke tolmaǵan.
30 jastaǵy er adam resmı saıttan eki bılet satyp alyp, olardyń derekterin ózgertý arqyly jalǵan bıletter jasaǵan. Keıin Threads áleýmettik jelisinde olardy satý týraly habarlandyrý jarııalaǵan.
Habarlandyrýǵa eki adam jaýap berip, satýshyǵa 50 myń jáne 40 myń teńgeden aýdarǵan. Aqshany alǵan soń, er adam satyp alýshylardy buǵattap, baılanysqa shyqpaı qoıǵan.
Osylaısha, jábirlenýshilerge kelgen jalpy shyǵyn — 90 myń teńge.
Sot zalaldy ótegenin jáne kinásin tolyq moıyndaǵanyn eskerip, er adamǵa eki jylǵa bas bostandyǵyn shekteý jazasyn taǵaıyndady. Sondaı-aq oǵan búkil jaza merzimine probatsııalyq baqylaý belgilendi.
Úkim zańdy kúshine endi.
Astana qalasynyń prokýratýrasy kontsert bıletterin tek resmı kózderden satyp alýǵa jáne áleýmettik jelilerdegi beıtanys satýshylarǵa aqsha aýdarmaýǵa keńes berdi.
Eske salaıyq, ,buǵan deıin Shymkentte Qaırat Nurtastyń kontsertin uıymdastyrýshy úıqamaqqa alynǵanyn habarlaǵan edik.
