Astana turǵyny qoǵamdyq kólik júrgizýshisine gaz shashty
ASTANA. KAZINFORM – Astana turǵyny avtobýs júrgizýshisine buryshty gaz shashty.
Kólik júrgizýshisi tártip buza otyryp, avtobýstyń aldyna shyǵyp ketken. Artynan ol kóliginen shyǵyp, qoǵamdyq kólik júrgizýshiniń betine buryshty gaz shashty. Oqıǵa Astana qalasyndaǵy Qaldaıaqov kóshesinde boldy.
«Avtobýs pen «Kia» markili kólik júrgizýshisiniń arasyndaǵy janjal kúndiz Qaldaıaqov kóshesinde boldy. Kólik júrgizýshisi jol erejesin buza otyryp qoǵamdyq kóliktiń aldyna shyǵyp ketken. Artynan kólikten shyǵyp, avtobýs júrgizýshisiniń betine buryshty gaz shashyp, boı tasalap úlgergen»,-delingen polıtsııa habarlamada.
Іzdestirý jumystarynyń barysynda «Kia» markili kóliktiń 37 jastaǵy júrgizýshisi ustalyp, kólik turaqqa qoıyldy. Sot sheshimimen ol buzaqylyq jasaǵany úshin 10 táýlikke qamaldy.
