Astana turǵyndaryna jyl basynan beri qandaı áleýmettik kómek kórsetildi
ASTANA. KAZINFORM – 2026 jyldyń birinshi toqsanyndaǵy eńbek naryǵynyń jaǵdaıy elordada turaqty bolyp, únemi baqylaýǵa alynǵan. Jumyssyzdyq deńgeıi respýblıkalyq ortasha kórsetkishten tómen deńgeıde qalyptasqan. Jumyspen qamtýdy qoldaý sharalary aıasynda 5 622 adam qamtylǵan, onyń ishinde 35 jasqa deıingi jastar sany – 2 909. Turaqty jumys oryndaryna 743 adam ornalastyrylsa, 1 191 adam qoǵamdyq jumystarǵa baǵyttalǵan.
Bul týraly qalalyq Kommýnıkatsııalar qyzmetindegi brıfıngide Astana qalasy Jumyspen qamtý jáne áleýmettik qorǵaý basqarmasynyń basshysy Erlan Júsipov málimdedi, dep habarlaıdy elorda ákimdiginiń resmı saıty.
Memlekettik qoldaý sharalarymen, onyń ishinde jastar praktıkasy, áleýmettik jumys oryndary jáne «Kúmis jas» baǵdarlamasy arqyly 400-den astam adam qamtyldy. Oqytý baǵytyna erekshe kóńil bólingen: 721 adam «Bastaý Bıznes» jobasy boıynsha oqytýdan ótti, 989 adam suranysqa ıe daǵdylar boıynsha onlaın oqydy, al 1 547 azamatqa kásiptik baǵdar berý qyzmeti kórsetildi.
Elektrondyq eńbek bırjasynda 1 127 jumys berýshiden 6 369 bos jumys orny ornalastyryldy, bul eńbek naryǵynyń qoljetimdiligin arttyrýǵa yqpal etti. Jumysqa ornalasý múmkindikterin keńeıtý maqsatynda jumys berýshiler men jumys izdeýshilerdiń qatysýymen 14 bos jumys oryndary jármeńkesi ótken.
– Óńirlik jumyspen qamtý kartasyn iske asyrý sheńberinde esepti kezeńde 6 591 jumys orny qurylǵan, onyń 4 963 turaqty, al 1 628 ýaqytsha. Negizgi úles jobalardy iske asyrý esebinen, 1 765 jumys orny jáne jeke bastamalar aıasynda qurylǵan 4 083 jumys orny arqyly qamtamasyz etildi. Qosymsha 743 adam bos jumys oryndaryna ornalastyryldy.
Bul sharalar halyqtyń turaqty jumyspen qamtylýyn qamtamasyz etip, ekonomıkalyq belsendiligin arttyrýǵa múmkindik berdi. 2026 jyly halyqtyń áleýmettik osal toptary úshin jańa bıznes-ıdeıalardy iske asyrýǵa 260 grant berý josparlanǵan, - deıdi basqarma basshysy.
Elordadaǵy áleýmettik qoldaý júıesi jyl saıyn 220 myńnan astam adamdy qamtyp, áleýmettik qyzmetter men tólemderdiń keń spektrin usynady. 2026 jyldyń birinshi toqsanynda 126 964 memlekettik qyzmet kórsetilgen, olardyń basym bóligi elektrondyq formatta usynyldy.
Astanada 39,8 myń kópbalaly otbasy, 8,3 myń kópbalaly ana, sondaı-aq 41 myńnan astam múgedektigi bar adam jáne múgedektigi bar balalardy tárbıelep otyrǵan 12,1 myń otbasy turady. Zeınetkerler sany - 134 570 adam.
Jyl basynan beri 56 otbasy turǵyn úıdi gazdandyrý shyǵyndarynyń ótemaqysyn aldy. 1 227 adam sanatorıı-kýrorttyq emdeýmen qamtyldy, al 2 638 azamatqa kommýnaldyq qyzmetter úshin ótemaqy berildi. Sonymen qatar 41 703 adam merekelik kúnderge oraı birjolǵy áleýmettik kómek aldy.
Ataýly áleýmettik kómek 1 048 otbasyǵa taǵaıyndalyp, 5 526 adamdy qamtydy, onyń ishinde 3 930 bala bar. 1 jastan 6 jasqa deıingi balalarǵa qosymsha tólemder 1 703 balaǵa berildi.
– AÁK alýshylar sanynyń turaqty túrde azaıý úrdisi baıqalady. Bul halyq tabysynyń artýymen, azamattardy jumyspen qamtý jáne kásipkerlikke tartý sharalarymen, sondaı-aq FCM SOCIAL júıesi sııaqty tsıfrlyq sheshimderdiń engizilýimen baılanysty.
Qalada 41 myńnan astam múgedektigi bar adam turady, olardyń jartysyna jýyǵy aleumet.egov.kz portaly arqyly tehnıkalyq ońaltý quraldarymen jáne qyzmettermen qamtylǵan. Jyl basynan beri jumysqa ornalasýǵa járdem surap 820 adam júginse, olardyń 268-i jumyspen qamtý sharalaryna tartyldy. «Invataksı» qyzmeti aıtarlyqtaı keńeıtildi: kólik sany 144 birlikke deıin artty, al qamtý 2,5 myńnan astam adamdy qurady. Sonymen qatar Yandex Go servısi negizinde pılottyq joba iske asyrylyp, ony shamamen 900 adam paıdalandy.
Qalada kedergisiz orta qalyptastyrý boıynsha júıeli jumys júrgizilýde, onyń ishinde beıimdelgen 5 týrıstik marshrýt ázirlendi. «Járdem» ortalyǵy, Paralımpıadalyq jattyǵý ortalyǵy jáne Inklıýzıvti sport ortalyǵy sııaqty mamandandyrylǵan nysandar jumys istep, keshendi ońaltý men áleýmettik beıimdelýdi qamtamasyz etip otyr, - deıdi Erlan Júsipov.
Qalada 15 uıym arnaýly áleýmettik qyzmet kórsetedi, onyń ishinde 7 memlekettik jáne 8 úkimettik emes uıym bar. Jalpy qamtý - 7 183 adam. Qyzmet sapasyn arttyrý maqsatynda bul uıymdardy lıtsenzııalaý boıynsha kezeń-kezeńimen jumys júrgizilýde.
Astanada 29 myńnan astam qandas turady, onyń ishinde 21 myńnan astamy Qazaqstan Respýblıkasynyń azamattyǵyn alǵan. 2025 jyldyń basynan beri negizinen Ózbekstan, Qytaı Halyq Respýblıkasy jáne Reseı Federatsııasynan kelgen 1 150 etnıkalyq qazaqqa qandas mártebesi berildi.
Sheteldik jumys kúshine kvotasy 1 185 birlikti quraıdy, alaıda naqty 1 651 ruqsat berilgen. Bul eńbek naryǵynyń qajettilikterine sáıkes jáne qoldanystaǵy zańnama aıasynda júzege asyrylady.
– 2026 jyly basqarma qyzmeti áleýmettik qoldaý júıesin odan ári jetildirýge jáne memlekettik kómekpen qamtylatyn halyq sanyn 200 myńnan astam adamǵa deıin ulǵaıtýǵa baǵyttalady. «Invataksı» qyzmetin damytýǵa, kedergisiz orta qalyptastyrýǵa, sondaı-aq kópbalaly jáne az qamtylǵan otbasylardy qoldaýǵa erekshe nazar aýdarylady.
Jumyspen qamtý salasynda 26,5 myń adamdy belsendi sharalarmen qamtý josparlanǵan, onyń ishinde 17 703 adam turaqty jumys oryndaryna ornalastyrylady. Sonymen qatar 33-ten astam bos jumys oryndary jármeńkesin ótkizý jáne 33 682 jumys ornyn qurý (onyń 28 744-i turaqty) kózdelgen, - dep spıker sózin túıindedi.
Eske sala keteıik, buǵan deıin bıyl ınklıýzıvti jumyspen qamtý múmkindigi keńeıtiletinin habarlaǵanbyz.
