Astana turǵyndary jedel járdemniń qozǵalysyn naqty ýaqyt rejıminde baqylaı alady
ASTANA. KAZINFORM – Elordada jedel járdem brıgadasynyń qozǵalysyn naqty ýaqyt rejıminde baqylaýǵa múmkindik beretin jańa tsıfrlyq servıs iske qosyldy.
Joba QR Densaýlyq saqtaý mınıstrligi, Astana qalasy ákimdigi jáne Yandex Qazaqstan kompanııasynyń birlesken pılottyq bastamasy aıasynda júzege asyrylyp jatyr.
Mınıstrliktiń málimetinshe, jedeldiktiń birinshi sanaty boıynsha shaqyrtý túsken kezde, naýqasqa avtomatty túrde ınteraktıvti karta siltemesi bar SMS-habarlama jiberiledi. Siltemeni ashý arqyly paıdalanýshy jedel járdem kóliginiń qaı jerde kele jatqanyn naqty ýaqytta baqylaı alady.
«Bul sheshim shuǵyl medıtsınalyq kómektiń ashyqtyǵyn arttyryp, azamattardyń alańdaýshylyǵyn azaıtýǵa jáne dıspetcherlik qyzmetke túsetin júktemeni azaıtýǵa múmkindik beredi», – dedi QR Densaýlyq saqtaý vıtse-mınıstri Erbol Ospanov.
Astana qalasynyń jedel járdem qyzmetiniń dereginshe, kún saıyn dıspetcherlerge 6 myńǵa jýyq qońyraý túsedi. Olardyń 40 paıyzy – jedel járdemniń kelý ýaqytyn naqtylaýǵa baǵyttalǵan qaıtalama qońyraýlar.
Avtomattandyrylǵan habarlandyrý júıesin engizý osy sanattaǵy qońyraýlardyń úlesin azaıtyp, resýrstardy jańa jáne shuǵyl shaqyrtýlarǵa baǵyttaýǵa jol ashady.
Qazirgi tańda servıs Astana qalasynda jedeldiktiń birinshi sanaty boıynsha keıbir shaqyrtýlar úshin qoljetimdi. Aldaǵy ýaqytta bul joba elimizdiń barlyq óńirlerinde keńinen qoldanylmaq.
Aıta keteıik, jańa fýnktsııa ıAndeks Kartanyń JavaScript API platformasy arqyly júzege asyrylǵan.
Mınıstrlik ókilderiniń atap ótýinshe, bul bastama medıtsınalyq kómektiń qoljetimdiligi men jedeldigin arttyrýǵa baǵyttalǵan tsıfrlyq transformatsııa aıasynda qolǵa alynǵan.
Aıta keteıik, Almatydaǵy Kardıologııa jáne ishki aýrýlar ǵylymı‑zertteý ınstıtýty koronarlyq arterııalardy zertteýge arnalǵan jasandy ıntellekti bar jańa býyn tamyrishilik ýltradybys (TІÝDZ) júıesin klınıkalyq tájirıbege engizgeni jaıly aıtqanbyz.
Buǵan deıin, Qazaqstan Respýblıkasynda koronavırýs ınfektsııasyna baılanysty epıdemıologııalyq jaǵdaı turaqty ekenin habarlaǵanbyz.