Astana turǵyndary aýlalaryn jańartýǵa ótinim bere alady
ASTANA.KAZINFORM — Astanada 2026 jyly «Halyq qatysatyn bıýdjet» jobasyn iske asyrý jalǵasyp jatyr. Atalǵan joba aıasynda turǵyndar óz aýlalaryn abattandyrýǵa jáne jańartýǵa múmkindik alady, dep habarlaıdy Astana qalasy ákimdiginiń resmı saıty.
Astananyń aýdan ákimdikterinde turǵyndardan ótinim qabyldaý júrip jatyr. «Halyq qatysatyn bıýdjet» jobasy azamattardyń bastamalaryn qoldaýǵa, atap aıtqanda aýlalardy kúrdeli jóndeýden ótkizýge, gúlzarlardy, saıabaqtardy jáne ózge de qoǵamdyq keńistikterdi qurýǵa baǵyttalǵan.
Baǵdarlama 7 kezeńnen turady:
- saraptamalyq keńes qurý,
- ótinim qabyldaý,
- jobalyq usynystardy taldaý,
- daýys berý,
- qorytyndy shyǵarý,
- jumys josparyn ázirleý jáne jobalardy iske asyrý.
Baıqońyr aýdanynyń turǵyndary ótinimderin aýdan ákimdiginiń resmı ınternet-resýrsy — www.baikonyr-astana.kz saıtynyń «Halyq qatysatyn bıýdjet-2025» bólimine joldaı alady. Ótinim qabyldaý 1 naýryzǵa deıin jalǵasady. Ótinim berý úshin joba ataýyn, sıpattamasyn kórsetý, eskız ben smetany (shamamen bolýy múmkin), aýmaqtyń qazirgi jaǵdaıyn kórsetetin fotosýretterdi tirkeý qajet. Qalaýy boıynsha prezentatsııasyn qosa berýge bolady. Osy bólimde jobanyń erejeleri, úlgilik jobalyq usynys, is-sharalardyń merzimderi jáne saraptamalyq keńes quramy da ornalastyrylǵan.
Almaty aýdanynda turǵyndardan ótinim qabyldaý 5 qańtarda aıaqtaldy. Qazirgi ýaqytta túsken usynystardy taldaý jáne tekserý júrip jatyr. Daýys berý 25 qańtar men 16 aqpan aralyǵynda ótedi. Ol úshin aýdan ákimdiginiń saıtynda nemese Egov Mobile qosymshasynda ETsQ arqyly avtorızatsııadan ótý qajet.
Saraıshyq aýdanynda ótinim qabyldaý 20 qańtarda bastalady. Ótinim qabyldaý kezeńinde qatysýshylar naqty ózgerister men bıýdjettik esepti kórsete otyryp, abattandyrý josparyn ázirleýi tıis. Daıyn jobalar aýdan ákimdiginiń resmı saıtyndaǵy «Paıdaly siltemeler» bóliminde ornalasqan «Halyq qatysatyn bıýdjet-2025» bólimine júkteledi. Tehnıkalyq taldaý men tekserýden keıin jobalar daýys berý kezeńine ótedi. Joba bul aýdanda 2025 jyldan beri júzege asyrylyp keledi. Ótken jyly 17 aýla jańartyldy. Bir turǵyn tek bir jobaǵa ǵana daýys bere alady. Jeńimpazdar úsh sanat boıynsha anyqtalady: 40 páterge deıin, 100 páterge deıin jáne 100 páterden kóp úılerdiń aýlalary.
Saryarqa aýdanynda da ótinim qabyldaý 20 qańtarda bastalady. «Halyq qatysatyn bıýdjet» jobasy bul aýdanda 2019 jyldan beri tabysty iske asyrylyp keledi. Osy ýaqyt ishinde turǵyndardyń 157 bastamasy júzege asyryldy. Tek ótken jyldyń ózinde 52 aýla jańartylyp, onyń 36 jobasy turǵyndardyń tikeleı qatysýymen iske asqan.
Nura aýdanynyń turǵyndarynan ótinim qabyldaý da qańtar aıynda bastalady. Joba aıasynda Astanada jyl saıyn 100-den astam aýla jańartylady. Turǵyndar baǵdarlamaǵa qatysý arqyly óz aýlalaryn jaqsartýǵa baǵyttalǵan jeke usynystaryn usyna alady.
Esil aýdanynda «Halyq qatysatyn bıýdjet» jobasy boıynsha ótinim qabyldaý 2026 jylǵy 23 qańtar men 1 naýryz aralyǵynda júrgiziledi. Osy kezeńde turǵyndar abattandyrýǵa qatysty naqty usynystaryn jáne qajetti bıýdjet esebin kórsetip, bastamalaryn joldaýy tıis.
Jobalar aýdan ákimdiginiń resmı saıtyndaǵy «Halyq qatysatyn bıýdjet-2026» bólimi arqyly qabyldanady. Ótinim qabyldaý aıaqtalǵannan keıin 5 sáýirge deıin tehnıkalyq tekserý jáne taldaý júrgizilip, kelesi kezeńge ótetin jobalar anyqtalady. Daýys berý 6-24 sáýir aralyǵynda ótse, 24-29 sáýirde qorytyndysy shyǵarylady. Al 4 mamyrǵa deıin saraptamalyq keńes iriktelgen bastamalardy iske asyrýdyń basymdyqtaryn aıqyndaıdy. Turǵyndar qoldaǵan jobalardy iske asyrý 2025 jylǵy 4 mamyr men 15 qyrkúıek aralyǵyna josparlanyp otyr.
Budan buryn depýtattar Astana men Mańǵystaý oblysyndaǵy qoqysty suraptaýǵa qatysty problema kótergen edi.