Astana týraly serıal: Mınıstrlik tapsyrysty reseılikterge berýdiń sebebin túsindirdi
ASTANA. QazAqparat - QR Mádenıet jáne sport mınıstrligi Astananyń 20 jyldyǵyna arnalǵan serıaldy reseılik «Pervyı kanal» basshysy Konstantın Ernstke tapsyrýdyń sebebin túsindirdi, dep xabarlaıdy QazAqparat tilshisi.
Mádenıet jáne óner isteri departamentiniń dırektory Almaz Nurazhannyń aıtýynsha, serıaldy birlesip túsirýdi Konstantın Ernsttyń ózi usyndy.
«Ol Astanaǵa da arnaıy kelip ketti. Olar tamasha stsenarıı jasap shyqty. Sosyn «ko-prodýktsııany» shyǵarýdy usynyp otyr. Ondaıda túsirý jumystary aıaqtalǵannan keıin barlyq shyǵyndar teń bólinedi. Jartysyn Qazaqstan tóleıdi, jartysyn olar óz moınyna alady. Dál qazir men somanyń naqty kólemin aıta almaımyn. Sebebi serıaldy túsirý jumystary aıaqtalǵansha ol soma ózgerýi ábden múmkin. Qazirgi kezde stsenarıı daıyn. Kastıng júrip jatyr. Ázirshe, barlyq shyǵyndardy reseılikter tólep jatyr», - dedi A.Nurazxan Astanada ótken baspasóz máslıxatynda.
Departament basshysynyń sózine qaraǵanda, Astana kúni qarsańynda Reseıdiń «Pervyı kanal» arnasymen birlesip túsiriletin «Maxabbat. Úmit. Astana» ("Lıýbov.Nadejda.Astana") atty serıaldyń tusaýkeseri ótedi. Rejısser - Konstantın Ernst.
«Serıalda Astananyń 20 jyldyń ishinde qalaısha ózgergenin jan-jaqty kórsetý kózdelip otyr. Atalǵan týyndy «Pervyı kanal» arnasynda jáne Qazaqstannyń barlyq telearnalarynda kórsetiledi. Serıaldyń aýdıtorııasy 350 mıllıon adamnan asady degen jospar bar», - dep atap kórsetti A.Nurazxan.
