FEI prezıdenti Ingmar De Vos: Qazaq dalasy - jahandyq jylqy mádenıetiniń tarıhı besikteriniń biri
ASTANA. KAZINFORM - Halyqaralyq at sporty federatsııasynyń (FEI) prezıdenti Ingmar De Vos elordada ótken halyqaralyq deńgeıdegi FEI Jumping World Challenge Final týrnırin joǵary baǵalady.
Alǵash ret Astanada halyqaralyq deńgeıdegi FEI Jumping World Challenge Final týrnıri 11 elden kelgen talantty shabandozdardyń basyn qosqan bolatyn.
QR At sporty federatsııasy baspasóz qyzmetiniń habarlaýynsha bul bedeldi jarystyń Qazaqstanda ótýi at sportynyń damýyna serpin berip qana qoımaı, elimizdiń halyqaralyq sporttyq is-sharalardy uıymdastyrýdaǵy áleýetiniń joǵary ekenin taǵy bir márte dáleldedi.
Týrnırdiń basty ereksheligi – qatysýshylardyń ózderine beıtanys, uıymdastyrýshylar usynǵan attarmen synǵa túsýi. Mundaı format shabandozdyń kásibı sheberligin, beıimdelý qabiletin jáne atpen az ýaqyt ishinde ózara senim ornata alýyn aıqyndaıdy.
FEI Jumping World Challenge Final týrnıri Qazaqstannyń álemdik at sporty qaýymdastyǵyndaǵy bedelin nyǵaıtyp, ulttyq at sportynyń jańa belesterge kóterilýine jol ashqan mańyzdy oqıǵa boldy.
- Eýrazııa - at sportyn damytýǵa eń perspektıvaly aımaqtarynyń biri. Al qazaq dalasy - jahandyq jylqy mádenıetiniń tarıhı besikteriniń biri. Mundaı týrnırler sportshylar men tulparlardyń úlken halyqaralyq alańdarda jarysý úshin tájirıbe jınaqtaýyna jaǵymdy orta retinde zor múmkindik beredi, - dedi halyqaralyq at sporty federatsııasynyń (FEI) prezıdenti Ingmar De Vos.
Osyǵan deıin habarlaǵanymyzdaı, Qazaqstan at sportynan Astanadaǵy halyqaralyq týrnırlerde 14 medal jeńip aldy.
