Astana turǵyndaryn jeńildetilgen nesıe alyp beremin dep aldaǵan adam 4 jylǵa sottaldy

ASTANA. KAZINFORM – Astanada 16 azamatty aldaǵan jergilikti turǵynǵa qatysty úkim shyqty, dep habarlaıdy Astana qalalyq prokýratýrasynyń baspasóz qyzmeti.

Baspasóz qyzmeti taratqan málimetterge qaraǵanda, bir aı ishinde jeńildetilgen nesıe alýǵa ýáde bergen alaıaqqa azamattar aqsha aýdarǵan.

Keltirilgen shyǵynnyń jalpy somasy 4 mln teńgeden asty.

Alaıaq ózin ulttyq kompanııanyń qyzmetkerimin dep tanystyryp, qyzmetterin 100 myń teńgege baǵalap, jeńildetilgen sharttarmen nesıe alýǵa kómektesýdi usynǵan.

- Sot er adamdy kináli dep taýyp, 4 jylǵa bas bostandyǵynan aıyrdy. Keltirilgen materıaldyq shyǵyn óndirildi.Úkim zańdy kúshine endi, - delingen habarlamada.

Prokýratýra qyraǵylyq tanytyp, resmı aqparat kózderi arqyly aqparattyń durystyǵyn tekserý qajettigine nazar aýdarady.

Osyǵan deıin Jambyl oblysynda ınternet alaıaqtyq eki esege óskeni týraly jazdyq.