Astana týǵan kúnin atap ótýde

Mereke qurmetine Astana qalasynda uıymdastyrylǵan is-sharalardyń aýqymy óte keń. Solardyń birqataryna toqtalyp ótsek. Tańerteńgilik «Jastar» saraıy, «Qazaqstan» sport kesheni, «Jeruıyq» saıabaǵy jáne eski ortalyqtaǵy alańdarda kópshilikke arnalǵan is-sharalar, buqaralyq serýendeýler jalǵasady.

Saǵat 11.00-de qalanyń ár jerindegi ashyq alańdarda «Astana samaly» úrlemeli aspaptar orkestrleriniń festıvali bastalady. Qazaqstandyq orkestrler men tanymal sahna sheberleriniń oryndaýyndaǵy klassıkalyq áýen men zamanaýı shyǵarmalary ashyq aspan astynda - ákimdik ǵımaraty aldyndaǵy alańda, «Jastar» saraıy mańyndaǵy kontsert sahnasynda, «Báıterek» monýmenti mańyndaǵy alańda ótýde. «Astana samaly» kóptegen eldiń ókilderin bir sahnaǵa jınaıtyn qaıtalanbas sazdy dýman. Keremet tehnıka men aıryqsha oryndaýshylyq sheberlik Astana turǵyndary men qonaqtaryna erekshe merekelik aýan syılaıtyn bolady.

Ákimdik ǵımaratynyń aldyndaǵy alańda meıramhanalardyń ashyq aspan astyndaǵy jármeńkesi jalǵasýda. Astananyń eń tańdaýly, kásibı aspazdarynyń qala kúnin merekeleý qarsańynda bas biriktirýi búginde dástúrge aınaldy. Ár halyqtyń ózindik as úlgileri men baıqaýǵa qatysýshylardyń fırmaly taǵamdaryn bilikti tóreshiler men halyq sarapshylary baǵalaıdy. Eń úzdigin anyqtaýǵa barlyq nıet bildirýshi qatysa alady. Uıymdastyrýshylar rýhanı azyq jaıyn da eskergen.

Al saǵat 12.00-de «Mega» saýda, oıyn-saýyq ortalyǵynyń alańyna talantty, birbetkeı, qaısar ári zamana kóshiniń udaıy basynda júrýge tyrysatyn jańa oıly jastar jınalady. Sporttyq saıysta TMD elderimen qatar, Eýropanyń túkpir-túkpirindegi memleketterdiń táýekelge bel býǵysh, jańashylǵa jany qumar jastary bas qosady. Parkýr, breık-dans, skeıtbord, strıtbol men graffıtı sheberleri myńdaǵan kórermendi ónerlerimen tánti etpek. «Táýekel tolqynyna» barlyǵy 2000-nan astam shetinen «sen tur, men ataıyn» degen óz isiniń sheberleri qatysady dep kútilýde.

«Han Shatyr» mańynda boı kótergen kóshpeliler aýyly festıvali, «Azııa jańǵyryǵy» tsırk óneriniń halyqaralyq festıvali, túrki mýzykasynyń «Astana-Arqaý» halyqaralyq festıvali qonaqtaryn búgin de tosady.

Al astarly, ádemi ázilderdi unatatyn qaýymdy búgin Kongress-Holl saraıyna shaqyramyz. Olarǵa elimizdiń jatypatar syqaqshylary Astana kúni merekesine kóptiń ishek-silesin qatyratyn ádemi ázilderin ázirlep otyr. Astarly ázil men qaǵytpa-qaljyń usynatyn otandyq syqaqshylar: Amanǵalı Sypabekov, Nurjan Tutov, Erbolat Tólegenov, Dárken Esimbekov, Qanat Áljapparov, Oljas Sydyqbekov, Qaırat Dombaev, Baqytjan Qasymov. Tanymal ánshiler Madına Sádýaqasova, Qaırat Baıekenov, Záttibek Kópbosynov jáne taǵy da basqalar kesh kórigin qyzdyra túspek.

Astana kúni merekesi jyl saıyn máńgilik esten ketpesteı áserli etip toılanýda. Elorda tórinde ótken túrli janrdaǵy kontsertter qala turǵyndary men qonaqtarynyń kópke deıin esinde saqtalatyny kóńil qýantady. Sebebi qalamyzdyń toıyna arnalǵan kontsertte jyl saıyn kúlli ǵalamǵa tanymal, álem halqy kórýge qumar áıgili ánshiler óner kórsetedi. Bıyl óner súıer qaýymǵa arnalǵan basty syılyqtardyń biri - álemge tanymal ánshi, óziniń asqan sheber soprano daýsynyń arqasynda án padıshasy atanǵan Sara Braıtmannyń jeke kontserti. Ol óz shyǵarmashylyǵynda eki mýzykalyq baǵytty - ótken ǵasyrdyń klassıkalyq mýzykasy men sońǵy onjyldyqtaǵy «pop» janryn sheber úılestire bildi. Kontsert Beıbitshilik jáne kelisim saraıynda, saǵat 18.00-de ótedi.

Tosynsyılar munymen aıaqtalmaıdy. «Saryarqa» respýblıkalyq velotrekte, 19.00-de arý qalany týǵan kúnimen hıt-sherýlerdiń jeńimpazy Mr. Black Star Tımatı, MýzTV syılyǵynyń «Proryv goda» nomınanty«Gradýsy» toby, ýkraındyq «Quest Pistols», qyzýqandy Arash, brıtandyq armanshyl ánshi Jay Sean quttyqtaıdy. Olarǵa otandyq tanymal estrada juldyzdary jup bolmaq. Atap aıtsaq, Dınara Sultan, Aıqynsyndy ánshiler men «Orda», «Rıngo» jáne «Ne vse skazano» toptary bar.

Esil ózeniniń ústine ornatylǵan qalqymaly sahnadan álemdik opera jáne balet juldyzdarynyń ónerin tamashalaýǵa bolatyn sońǵy kún. BaǵdarlamadaShtraýs, Chaıkovskıı, Motsart syndy álem klassıkteri men L.Hamıdı, E.Rahmadıev, A.Jubanov, T.Qajyǵalıev, S.Muhamedjanov, M.Tólebaev syndy otandyq kompozıtorlardyń týyndylary oınalady. Qatysatyndar - Abaı atyndaǵy Memlekettik Akademııalyq opera jáne balet teatrynyń sımfonııalyq orkestri.

Astananyń týǵan kúnin atap ótýge arnalǵan merekelik, mádenı is-sharalardyń shyrqaý shegi - «Qazaq eli» monýmentiniń aldyndaǵy alańda ótetin «Astana - baqyt mekeni» gala-kontserti bolmaq.

Shara sońynda sáýleti men dáýleti kelisken, kúnnen kúnge ajarlanyp, kórkeıip kele jatqan jas elordamyz - Astana qalasynyń qurmetine merekelik otshashý bolady.