«Astana» tórt jańa veloshabandozben kelisimshart jasasty
ASTANA. QazAqparat - «Astana» velokomandasy jańa tórt shabandozben mámile jasasty. Olar eki jyldyq kelisimshartqa ıe boldy, dep habarlady cyclingedge.ru portaly.
Jańa shabandozdar - Oskar Gatto, Mıhael Valgren, Iesper Hansen jáne Moreno Mozer. Alǵashqy úsheýi - Tinkoff komandasynan aýysty, al Mozer - Cannondale-Drapac komandasynan kelgen.
31 jastaǵy Oskar Gatto klassıkalyq jarystarǵa mamandanǵan, qanjyǵasynda 14 jeńis bar, onyń ishinde Dwars door Vlaanderen júldesi de bar. On jyl ishinde ıtalıandyq on bir Grand týrǵa qatysqan.
24 jastaǵy Mıhael Valgren «Lej - Baston - Lej» jarysynda eki ret jeńimpaz atanǵan (2012 jáne 2013 jyldary), jáne Danııa chempıonatynda da eki ret jeńiske jetti. Sondaı-aq, bıyl aıtýly Amstel Gold Race tuǵyrynan kórindi. Jaqynda ótken «Týr de Fransty» qosqanda, velosportpen aınalysqan alty jyl ishinde Mıhael úsh Grand týrǵa qatysqan.
25 jastaǵy Iesper Hansen taý jarystaryna jáne kezeńderge mamandanǵan. 2015 jyly «Norvegııa týrynyń» chempıony atandy jáne bir kezeńinde jeńiske jetti, 2016 jyly «Horvatııa týrynda» ekinshi orynǵa ıe boldy.
25 jastaǵy Moreno Mozer - ataqty ıtalıandyq veloshabandoz Franchesko Mozerdiń nemeresi, onyń qorjynynda jeti altyn bar. «Polsha týrynda» jeńimpaz atanyp (2012 jyly), eki kezeńinde jeńiske jetti. 2013 jyly «Strade Bıanke» jarysynda da qatarynan ozyp shyqty.
«Bıyl tórt jańa velosportshymen kelisimshartqa otyrdyq. Oskar Gatto - klassıkalyq jarysýshy jáne tamasha márege jetýshi. Onyń tájirıbesi kóp jáne Alekseı Lýtsenkoǵa kómektesetin bolady. Mıhael Valgren de mol tájirıbeli sportshy, al Iesper Hansen taý kezeńderi men marafondy qashyqtyqtarda Fabıo Arýǵa járdemdesedi. Árıne, Moreno Mozer bizdiń qozǵaýshy kúshimiz bolmaq, onyń áleýeti óte myqty, «Parıj - Nıtstsa» sekildi jarystarda ol ózin bar qyrynan kórsetedi degen senimdemin. Ol «Djıro» jarysynda ózin tanytty, odan da joǵary jetistikterge jetedi», - dep málimdedi «Astananyń» bas menedjeri Aleksandr Vınokýrov.
