Astana tórinde ústel tennısinen Azııa chempıonaty ótedi
Qazan aıynyń basynda Astana ústel tennısinen Azııa birinshiligin qabyldaıdy. Bizdiń elimiz atalǵan sport túrinen qurlyq dodasyn tuńǵysh ret ótkizgeli otyr.
Ústel tennısinde álem úzdikteri azııalyq sportshylardan quralǵany jasyryn emes. Sondyqtan, jankúıerler óte tartysty kezdesýlerdiń kýási bolmaq, dep jazady Olympic.kz.
Azııa chempıonaty sportshylar deńgeıi men básekelestik jaǵynan álem birinshiliginen kem túspeıdi. Onyń ústine, álemdik sportta sary qurlyq ókilderi ústemdik tanytatyny anyq.
Másele, 2023 jylǵy álem chempıonatynda júldegerler úshtigi tek qana azııalyqtardan quraldy: Qytaı birinshi, Ońtústik Koreıa ekinshi, Japonııa úshinshi oryn ıelendi (ÁCh tarıhynda Qytaı jalpy esepte alda keledi). Sondyqtan, Azııa birinshiligin álem alyptarynyń aıqasy dep senimmen ataýǵa bolady.
Qytaı quramasynan kóshbasshylyqty tartyp alý qıyn. 1952 jyldan beri ótkizilip kele jatqan Azııa birinshiliginde (aldymen TTFA, keıin ATTU uıymdastyrdy) qytaılyqtar jalpy esebi 135 altyn, 84 kúmis jáne 108 qola medal enshilegen. Ekinshi orynda kele jatqan Japonııa qorjynynda 18 altyn, 24 kúmis jáne 71 qola medal bar. Qazaqstan sportshylary Azııa birinshiliginde birde-bir ret tuǵyrǵa kóterilgen joq.
Qurlyq dodasynda eki másele tur:
- Qytaıdy basqa el ókilderi jeńe ala ma?!
- Qazaqstan óz tarıhynda Azııa birinshiliginen qandaı da bir júlde ala ma?!
Bizdiń komandanyń basty maqsatyna jetýge jergilikti jankúıer qoldaýy men jarystyń óz jerimizde ótýi kómektesýi múmkin. Astanaǵa keletin sportshylarǵa qarap, qandaı da bir boljam jasaý qıyn. Biraq, bul – sport. Munda árkimniń de júlde alatyn múmkindigi bar.
Aldaǵy Azııa chempıonatynda 26 elden barlyǵy 210 sportshy óner kórsetedi. Atap aıtar bolsaq, Bahreın, Gonkong, Úndistan, Iordanııa, Iran, Iemen, Katar, Qytaı, Qytaılyq Taıpeı, KHDR, Qyrǵyzstan, Malaızııa, Maldıv, Mońǵolııa, Nepal, Oman, Pákistan, Saýd Arabııasy, Sıngapýr, Taıland, Ózbekstan, Fılıppın, Shrı-Lanka, Ońtústik Koreıa
Qazaqstan astanasynda júldege talasatyn álemdik juldyzdar sanynda shek joq. Erler arasynda komadalyq synda Tokıo jáne Parıj Olımpıadalarynda chempıon atanǵan Van Chýtsın (Qytaı), komandalyq synda eki dúrkin álem chempıony Lıan Tszınkýn (Qytaı), komandalyq synda úsh dúrkin álem chempıony Lın Gaoıýan (Qytaı), komandalyq synda Tokıo Olımpıadasynyń qola júldegeri Tomokazý Harımoto (Japonııa) Astanada baq synaıdy. Sondaı-aq, juptyq synda álemniń kúmis júldegeri Chan Ý Djın (Ońtústik Koreıa) úzdikterge báselekes bolmaq.
Áıelder arasynda komandalyq synda Tokıo jáne Parıj Olımpıadasynyń chempıony Sýn Insha, eki dúrkin Olımpıada chempıony Van Manıýı (ekeýi de - Qytaı), Parıj Olımpıadasynyń qola júldegeri Hına Haıata (Japonııa), Olımpıadanyń kúmis júldegeri Mıva Harımoto (Japonııa), komandalyq jáne aralas juptyq synda Olımpıadanyń qola júldgeri Shın ıÝbın (Ońtústik Koreıa) júldege talasady.
Qazaqstan namysyn tómendegi sportshylar qorǵaıdy:
- Kırıll Gerasımenko;
- Alan Qurmanǵalıev;
- Iskander Harkı;
- Aıdos Kenjeǵulov
- Sanjar Jubanov;
- Sarvınoz Mırkadırova;
- Zaýresh Aqasheva;
- Anastasııa Lavrova;
- Anel Bahyt;
- Angelına Romanovskaıa.
Bizdiń komandanyń basty úzdigi – Parıj Olımpıadasynda 1/8 aınalymǵa deıin jetip, toǵyzynshy oryn ıelengen Kırıll Gerasımenko. Ol Parıj oıyndarynda Eýropa chempıony Dan Tsıýden 1:3 esebimen utylyp jatyp, keıin 4:3 esebimen jeńgen bolatyn.
Jaqyn arada Alan Qurmanǵalıevtiń jetistikterin de estýimiz múmkin. Ol jastar arasyndaǵy álem chempıonatynyń kúmis jáne qola júldegeri.
Anastasııa Lavrova Tokıo Olımpıadasynda baq synaǵan. Onyń jetistikterin de umytýǵa bolmaıdy.
Azııa chempıonaty 6-13 qazan kúnderi BEELINE ARENA Ulttyq tennıs ortalyǵynda ótedi. Kirý tegin.
