Astana tórinde qutqarýshy sarbazdar sap túzep barady

ASTANA. KAZINFORM — Elordadaǵy áskerı paradta Tótenshe jaǵdaılar mınıstrliginiń halyqty órt pen tasqynnan, zilzala men tehnogendik apattan qutqarýǵa mamandanǵan ofıtserleri men serjanttary boı kórsetti.

Arys pen Baızaq aýdanyndaǵy alapat jarylystar; Qostanaı, Abaı oblysyndaǵy orman órtteri; Jomart, Lenın shahtalaryndaǵy qaıǵyly apattar; keıingi 80 jylda bolmaǵan, 100 myńnan astam adamnyń ómirine áser etken 2024 jylǵy tasqyn; bulardyń bári Tótenshe jaǵdaılar qyzmetin shuǵyl reformalaý kerektigin kórsetken. Parad alańynda osy reformalardy júıkesimen sezinip, ón boıynan ótkizip júrgen sarbazdar ketip barady. 

Astanadaǵy turǵyn úıde bolǵan órtten adamdardy qutqarý jolynda erlikpen qaza tapqan qutqarýshy Asqar Zabıkýlın táýelsiz TJM júıesindegi qyzmetkerlerdiń máńgi úlgi tutar tulǵasy bolyp tarıhta qalǵany jurttyń jadynda. 

Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan.

Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysyp otyr. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qosýda.