Astana tórinde 4 jyldan soń quraq kórpe stılindegi shyrsha qaıta tigildi
ASTANA. KAZINFORM — Elordadaǵy Nurjol býlvarynda quraq kórpe stılinde jasalǵan ekologııalyq shyrsha qaıta ornatyldy. Áleýmettik mańyzy bar joba bıyl toqyma oıynshyqtarmen tolyqtyryldy.
Jobany «Sheberlik joly» qoǵamdyq qory júzege asyryp otyr. Qor basshysy, jobanyń avtory Rahıma Muqysheva bul bastama alǵash ret 2020 jyly qolǵa alynǵanyn aıtady.
— Quraq kórpe stılindegi bul shyrsha alǵash ret 2020 jyly jasalǵan, oǵan 200-den astam adam qatysqan. Bıyl turǵyndardyń suranysymen jobany qaıta jańǵyrttyq, — dedi ol.
Uıymdastyrýshylardyń aıtýynsha, bıyl joba aıasynda 50-den astam erikti eki kún ishinde 100-den asa toqyma oıynshyq daıyndaǵan. Qatysýshylar toqýdy nólden bastap úırengen.
Joba urpaqtar arasyndaǵy baılanysty nyǵaıtty. Oǵan ájeler, ata-analar, jastar men balalar birlesip qatysqan. Eń jas qatysýshynyń jasy 6-da bolsa, eń úlkeni 70-te.
Jobaǵa qatysýshylardyń biri Zeınolla Ásem toqýdyń áleýmettik mańyzyna toqtaldy.
— Toqý men úshin jaı hobbı emes, adamdarǵa jaqsylyq syılaıtyn is. Osy joba arqyly meıirim men eńbektiń qundylyǵyn kórsetkim keledi, — dedi ol.
Quraq kórpe stılindegi shyrsha buǵan deıin sheteldik buqaralyq aqparat quraldarynda da kórsetilgen. Uıymdastyrýshylardyń aıtýynsha, bul bastama aldaǵy jyldary da jalǵasyn tabady.
Aıta keteıik, Petropavlda jańa jyl merekesi qarsańynda kóne shyrsha oıynshyqtarynyń kórmesi bolǵanyn jazǵan edik.