Astana tórinde Táttimbet kúıleri terbeldi
ASTANA. QazAqparat - Búgin Astana tórinde dáýlesker kúıshi Táttimbettiń kúıleri terbeldi. Qazaqstan Respýblıkasy Mádenıet jáne sport mınıstrliginiń uıymdastyrýymen Qazaq ulttyq óner ýnıversıtetiniń kontsert zalynda halyq kompozıtory, kúıshi Táttimbet Qazanǵapulynyń 200 jyldyq mereıtoıyna arnalǵan saltanatty kontsert ótti.
Kontsert barysynda kúıshi-kompozıtor, shertpe kúı óneri mektebiniń negizin qalaýshy Táttimbet Qazanǵapulynyń buryn-sońdy jarııalanbaǵan kúıleri engen CD-dısk taratylyp, kúıshiniń murasyn zerttegen tulǵalardyń qundy derekteri negizinde jaryqqa shyqqan fotoalbom tanystyryldy. Al Seken Turysbek, Muhamedjan Tileýhanov, Bilál Ysqaq, Sársenǵalı Júzbaı, Rymhan Ábilhanuly syndy belgili kúıshiler kontserttiń sánin keltirdi. Aıta keteıik, Táttimbet - kúmbirlegen qońyr daýysty shertpe kúı óneriniń negizin salýshy. Onyń «Bylqyldaq» jáne «Qosbasar» kúıleri E.Brýsılovskııdiń «Qyz Jibek» operasynda jáne A.Jubanov pen L.Hamıdıdiń «Abaı» operasynda, «Saryjaılaý» kúıi «Jambyl» fılminde jáne t.b. kóptegen kúıleri qazirgi zamanǵy opera, sımfonııa jáne kameraly-aspapty shyǵarmalarda qoldanylyp keledi.
