Astana tórinde Muhıttyń asqaq ánderi shyrqaldy

«Salmasam Aınamkózge án bolmaıdy» degen ataýmen ótken án keshine jınalǵandar aldynda Astana qalasy ákimdigi memlekettik fılarmonııasynyń «Saryarqa» ult aspaptar ansambli jáne Halyq án bóliminiń ánshileri óner kórsetti. Atap aıtqanda, «Saryarqa» ult aspaptar ansambli elge tanymal birqatar kúılerdi oryndady. Al «Shalqyma» halyq bı ansambliniń bıshi qyzdary myń buralyp bı bilep, kórermenderge óz ónerlerin pash etti.

Osy keshtiń shyraıyn kirgizip, zor qoshemetke ıe bolǵan elimizdiń eńbek sińirgen qaıratkeri, belgili ánshi Aıgúl Qosanova Muhıt Meráliulynyń «Aınamkóz», «Kishi Aıdaı» ánderin naqyshyna keltire shyrqady.

Óz kezeginde halyqaralyq konkýrstardyń laýreattary Aızada Qazbekova, Úmit Sattarova, Rahat Begasylov, Nurjan Tileýjan sahnaǵa shyǵyp, Muhıttyń elge keń taralǵan «Aqıis», «Úlken Aıdaı», «Beınem-aý», «Qaraqanshyq» ánderin áýeletti.

Qazaqstan «Jastar» odaǵy syılyǵynyń ıegeri Nuraı Tanabaev Muhıttyń «Kók Aıdaı» ánin oryndady.

Qazaq ulttyq óner ýnıversıtetiniń stýdentteri Nurbolat Isaev pen Jalǵas Sultanov Muhıttyń «Demalys», «Alýash», «Záýresh» ánderin shyrqap, kórermenderdiń ystyq yqylasyna bólendi.

Osy keshte ánder oryndalar aldynda Muhıt Meráliulynyń ómir joly, aqyndyq, sazgerlik ereksheligi týraly kórermenderge maǵlumat berilip otyrdy. Muhıttyń kezinde dombyrashy bolǵany, ózi shyǵarǵan kúıi de bar ekeni aıtyldy.

Aıta ketý kerek, ataqty ánshi, kompozıtor, aqyn Muhıt Meráliuly 1841 jyly Qazirgi Batys Qazaqstan oblysy, Qaratóbe aýdanynyń (burynǵy Oral gýbernııasy, Jympıty ýezi, Jaqsybaı bolysy) Aqbaqaı eldi mekeninde dúnıege kelgen.

Búgingi tańda elimizde Muhıttyń ánshilik dástúri negizinde ánshilerdiń Batys Qazaqstan óńirine tán «Muhıt mektebi» qalyptasqan.