Astana tórinde - «Qunanbaı» kórkem fılmi
ASTANA. QazAqparat - Erteń, 16 mamyr kúni saǵat 16.00-de Astanadaǵy «Qazmedıa ortalyǵynyń» kıno zalynda «Qunanbaı» kórkem fılminiń tanystyrylymy ótedi.
Bul fılmge halqymyzdyń uly aqyny Abaıdyń ákesi, tarıhı tulǵa, aǵa sultan Qunanbaı Óskenbaıulynyń ónegeli ómiri arqaý bolǵan.
Kórkem týyndyny Sháken Aımanov atyndaǵy «Qazaqfılm» ulttyq kınostýdııasy túsirgen. Fılmniń stsenarııin Doshan Joljaqsynov pen Talasbek Ásemqulov jazǵan. Al mýzykasyn jazǵan - Tólegen Muhamedjanov. Basty róldi Qazaqstannyń Halyq ártisi, Memlekettik syılyqtyń ıegeri, qazaq mádenıetiniń kórnekti qaıratkeri Doshan Joljaqsynov somdaǵan.
«Qunanbaı» fılminiń tanystyrylymyna memleket jáne qoǵam qaıratkerleri, zııaly qaýym ókilderi shaqyrylyp otyr.
